Միակ հարցն այն պետք է լինի՝ ինչ անել, որ Արցախը մնա հայկական․ ինչը դրան օգնում է պետք է աջակցել, ինչը խանգարում է, պետք է պայքարել․ Ռուբեն Վարդանյան

Մարդիկ, որոնք Արցախում են, պատրաստ են պայքարել, որ Արցախը մնա հայկական, իրենք կանգնած են այդ ուժերի կողքին։ Այս մասին հայտարարեց  «Արցախի անվտանգության և զարգացման ճակատ» հանրային շարժման համակարգող, ԱՀ նախկին պետնախարար  Ռուբեն Վարդանյանը՝ իր և Մանե Թանդիլյանի համատեղ ասուլիսի ժամանակ։ Նա միացել էր տեսակապով։

Ռուբեն Վարդանյանն ընդգծեց, որ բոլոր այն ուժերը, որոնք ընդունում են այն գաղափարը, որ Արցախը չի կարող լինել Ադրբեջանի կազմում, ընդունելի են իրենց ուժի համար։

«Մեր նպատակն է համախմբել այն ուժերը, որոնք իսկապես պատրաստ են դրա համար աշխատել, պայքարել, որ Արցախը չլինի Ադրբեջանի կազմում։ Մենք նաև համագործակցելու են պետության հետ, որ միասին կարողանանք այդ ճանապարհն անցնել։ Այն ուժերը, որոնք ուրիշ ճանապարհ են առաջարկում, մենք չենք կարող իրենց հետ համագործակցել, վտանգավոր դեր են խաղում»,- ասաց Վարդանյանը։

Նրա գնահատմամբ, այսօր հայրենական պատերազմական ռեալ իրավիճակ է, ու պետք է ունենալ հստակ դիրքորոշում՝ պատժել այն մարդկանց, որոնք այդ մոտեցումներին խանգարելու են իրենց քայլերով։

«Այս իրավիճակում սխալ է պաշտոնի  համար  կռվել, միակ հարցն այն պետք է լինի՝ ինչ անել, ինչն է օգնում Արցախը մնա հայկական, պահել Արցախը որպես պետություն, ինչը դրան օգնում է պետք է աջակցել, ինչը խանգարում է, պետք է պայքարել»,- նշեց Վարդանյանը։