Բաքուն հնչեցրել է Արցախի հայերի միակ հնարավոր ապագան

Ադրբեջանի արտգործնախարար Ջեյհուն Բայրամովը հայտարարել է, որ երկրի տարածքում այլևս գորշ գոտիներ չեն լինի, և Ղարաբաղի (արցախցիներ -խմբ․) հայերի միակ ճանապարհն Ադրբեջանի կազմում իրենց ապագայի քննարկումն է։ Այս մասին գրում է РИА Новости գործակալությունը։

«Միակ ճանապարհը Ղարաբաղի հայերի (Արցախի -խմբ․) համար երկխոսությունն է և Ադրբեջանի կազմում իրենց ապագայի քննարկումը: Այլ ճանապարհ պարզապես չկա, քանի որ մնացած ամեն ինչ անօրինական է: Սա մեր կարմիր գիծն է: Այլևս գորշ գոտիներ չեն լինի»,- ասել է նա։ 

Ադրբեջանական դիվանագիտության ղեկավարը միաժամանակ պնդում է, որ Լաչինի միջանցքից օգտվում են Կարմիր խաչի միջազգային կոմիտեի (ԿԽՄԿ) ներկայացուցիչները, որոնք տարածաշրջան են բերում դեղեր և «այլ անհրաժեշտ պարագաներ»։ Ամեն օր տասնյակ հայ բնակիչներ «հանգիստ» անցնում են (ադրբեջանական ապօրինի -խմբ.) անցակետով (Քաշաթաղի միջանցքում-խմբ.) երկու ուղղություններով, նրանք տեղափոխում են հիվանդ մարդկանց, բացի այդ, ԿԽՄԿ-ն դեղորայք և այլ անհրաժեշտ պարագաներ է բերում տարածաշրջան: Բաքվի դիրքորոշումն է օգտագործել բոլոր այլընտրանքային երթուղիները (Արցախի հետ կապը, այդ թվում՝ Ակնայից ճանապարհները - խմբ.), եթե խնդիրը ( Արցախի հաղորդակցությունն աշխարհի հետ - խմբ.) իրոք հումանիտար դաշտից լիներ, ապա այն կլուծվեր շատ կարճ ժամանակում՝ զուգահեռաբար բացելով մի քանի ճանապարհ»,- նշել է Ադրբեջանի ԱԳ նախարարը: