«Խոսքը ժամերի մասին է»․ Մամիջանյանը կոչ արեց բոլորին մի որոշ ժամանակ սպասել

«Արցախի նորընտիր նախագահին Հայաստանի գործող իշխանություններից որևէ մեկը չի շնորհավորել։ Աշխարհաքաղաքական դերակատարներից երևի թե միայն Ռուսաստանն է, որ որևէ բացասական արձագանք նախագահ Սամվել Շահրամանյանի ընտրությանը չի արել»։ Այս մասին լրագրողների հետ զրույցում ասաց «Պատիվ ունեմ» խմբակցության ղեկավար Հայկ Մամիջանյանը։

Դա Մամիջանյանին հետևություններ անելու տեղիք է տալիս։ Նրա դիտարկմամբ, վերոշարադրյալ իրավիճակը հուշում է այն մասին, որ ինչքան էլ իշխանությունները քարոզեն, տարածեն, թե Արցախը չունի դաշնակիցներ՝ Արցախն ունի դաշնակիցներ, և դա տեսանելի է։

Անդրադառնալով ռուսական հումանիտար բեռի՝ Արցախ մտելուն, Մամիջանյանը կոչ արեց բոլոր քաղաքացիներին մի որոշ ժամանակ սպասել։

«Խոսքը ժամերի մասին է։ Վստահեցնում եմ՝ բոլորը կհասկանան, թե ինչ գործընթաց է տեղի ունենում և ինչ արդյունքներ գրանցեց Արցախի նորընտիր ղեկավարությունը։ Որոշումներն ու գործընթացներն անհրաժեշտ է  գնահատել փաթեթային, վստահ եմ, որ մոտ ժամանակերում հնարավոր կլինի հասկանալ, թե այս գործընթացն ինչի էր միտված»,- ասաց նա։

Մամիջանյանի խոսքով` Արցախը պետք է դիմանա, ինչպես և անում է, մինչև Երևանը փոխի. «Այսինքն`  Արցախը դիմանա, մինչև Երևանը փոխի։ Երկու հայկական պետությունների գոյության այլ տարբերակ գոյություն չունի»։

Նրա խոսքով` Երևանը փոխվելու է մեր բոլորի, դրսում կանգնած քաղաքացիների, հայրենասերների քրտինքով։

«Եթե Փաշինյանն անմտություն անի՝ նաև արյամբ, ապա ինչ-որ պարտավոր ենք անել քաղաքական ուժեր, անում ենք, կանենք։ Մեր բանաձևը պարզ է՝ մենք մեր անելիքը կանենք, ուրախ կլինենք, վստահ ենք, որ մեր կողքին կկանգնեն մեր հայրենասեր քույրերն ու եղբայրները, այլընտրանք չկա»,- ասաց ան։