Այն, ինչ արվում է Արցախի նկատմամբ, ժամանակի ընթացքում կարվի նաև Հայաստանի նկատմամբ․ Քոքս

Առանց հայկական Արցախի Հայաստանի Հանրապետության գոյությունն էլ ավելի կվտանգվի, քան վտանգված է այսօր։ Երևանում՝ Իրավունքի և արդարության կենտրոն «Թաթոյան» հիմնադրամում տեղի ունեցած ասուլիսում ասաց Միացյալ Թագավորության Լորդերի պալատի անդամ, Մարդասիրական օգնություն բարեգործական կազմակերպության հիմնադիր, նախագահ բարոնուհի Քերոլայն Քոքսը։

Նա զրուցել էր Հայաստանում գտնվող արցախցիներից մեկի հետ ու որոշել լրագրողներին փոխանցել նրա խոսքերը։

«Արցախցին ինձ ասաց, որ ամեն օր տեսնում է տատիկին՝ Արցախում հացի հերթում կանգնած, նա տատիկին միայն տեսնում է հացի հերթի լուսանկարներով։ Տատիկն ամեն օր հերթից ձեռնունայն է տուն վերադառնում։ Միակ բանը, որ արցախցին ուզում է, այն է, որ շրջափակումը հնարավորինս շուտ վերջանա, որպեսզի ընտանիքը նորից միասին լինի»,- ասաց բարոնուհին։

Նրա գնահատմամբ, Արցախի բնիկ հայ քրիստոնյա բնակչությունը կանգնած է իր պատմական հողերից էթնիկ և կրոնական զտումների աճող հավանականության առջև, և դեռ որևէ ազգ չի արձագանքել հայ ժողովրդի աղաղակներին։

«Շատ վշտացած եմ միջազգային գերտերությունների գործողություններից, որոնք շարունակում են ճնշում գործադրել Հայաստանի վրա՝ ընդունելու Ադրբեջանի ինքնիշխանությունն Արցախի նկատմամբ։ Ո'չ ՄԱԿ-ը, ո'չ ԵԱՀԿ-ն, ո'չ ԱՄՆ-ն, ո'չ ՆԱՏՕ-ն, ո'չ Ռուսաստանը և ոչ էլ ՀԱՊԿ-ը։ Հարց է առաջանում՝ միջազգային հանրությունից ո՞վ դեմ կկանգնի, եթե Բաքուն տարածքային հավակնություներ ունենա Երևանի, Սևանի կամ Զանգեզուրի նկատմամբ։ Ադրբեջանական քաղաքական ղեկավարությունը չի թաքցրել իր ռազմավարական նպատակը, այն է՝ գրավել ձեր հայրենիքը»,- հավելեց նա։

Ըստ Քերոլայն Քոքսի` միանգամայն հնարավոր է, որ այն, ինչ արվում է Արցախի նկատմամբ, ժամանակի ընթացքում կարվի նաև Հայաստանի նկատմամբ։

«Եթե այն պայմանագիրը, որը բանակցվում է Հայաստանի ու Ադրբեջանի միջև, արդյունքում Արցախը հանձնվի, ապա տևական խաղաղություն տարածքում չի երաշխավորվում, չի էլ կարող»,- ասաց բարոնուհին։