Snoop Dog-ին բերում ենք, որ որևէ մեկը չմտածի, թե Հայաստանը չկա, Հայաստանը ծնկի է եկել․ Փաշինյան

Մենք Երևանի երիտասարդությանը շատ մեծ նվեր ենք պատրաստել. սեպտեմբերի 23-ին տեղի է ունենալու համաշխարհային աստղ Snoop Dog-ի համերգը: Այս մասին Երևանի քաղաքապետարանի դիմաց ՔՊ-ի հանրահավաքի ժամանակ իր ելույթում ասաց ՀՀ վարչապետ Նիկոլ Փաշինյանը:

«Մարդիկ ասում են՝ ինչու է կառավարությունն այդքան փող ծախսում, որ էդ աստղին բերի Հայաստան ու Երևան: Ժողովուրդ, ես մի բան ասեմ, մենք հաճախ դառը խոստովանություն չենք անում։ Մենք ասում ենք՝ 3 հազար տարվա ժողովուրդ ենք, իսկ որեւէ մեկը վիճակագրություն արե՞լ է, թե Հայաստան բառը աշխարհի բնակչության քանի՞ տոկոսը գիտի: Այո, նաեւ դրա համար ենք բերում, երբ նման մասշտաբի աստղերի համերգ է տեղի ունենում Հայաստանում, Հայաստան անունը շրջանառվում է աշխարհում, երիտասարդության շրջանում, սոցցանցերում: Մենք դա անում ենք Հայաստան անվան համար, որ որևէ մեկը չմտածի, թե Հայաստանը չկա, Հայաստանը կոտրվել է, թե Հայաստանը ծնկի է եկել: Հայաստանը ապրում է, կա, ու զարգանում է»։