Յուրաքանչյուր քաղաքացու համար հատկացված գումարը փոխանցվելու է իր բանկային քարտային հաշվի․ Նազելի Բաղդասարյանը՝ արցախահայերի տրամադրվող գումարի մասին

Այս շաբաթվանից սկսվելու է 100-հազարական դրամների բաշխման գործընթացը. բանկային քարտ չունեցողները պետք է բանկային հաշիվ բացեն և ներկայացնեն դրանք Միասնական սոցիալական ծառայություններ, որոնք աշխատում են 24/7 ռեժիմով: Այդ մասին ճեպազրույցի ժամանակ Փաշինյանի խոսնակ Նազելի Բաղդասարյանը:

Նրա փոխանցմամբ, արցախահայերը (խմբ․) նախ պետք է այցելեն որևէ բանկ և բացեն որևէ հաշվեհամար:

«Արդեն իսկ ԿԲ-ի կողմից պայմանավորվածություն կա, որ այդ հաշվեհամարները բացվելու են անվճար: Այնուհետև այդ քարտային համարները փոխանցելու են Միասնական սոցիալական ծառայություն»,- ասաց  Բաղդասարյանը։

Նա նշեց, որ եթե անգամ քարտերի տրամադրման գործընթացը սովորաբար 1 շաբաթ կամ 10 օր է տևում, ապա քարտային հաշիվները բացվում են շատ արագ և տեղում:

«Այսինքն՝ ձեր գումարը այս դեպքում կգումարվի քարտային հաշվին, որից կկարողանաք կանխիկացնել, և հետայսու, երբ տրամադրեն ձեր քարտերը, մյուս սոցիալական աջակցությունները կկարողանաք կանխիկացնել ցանկացած բանկոմատում»,- ասաց նա:

Նազելի Բաղդասարյանն անդրադարձավ նաև հաճախ տրվող այն հարցին, թե հնարավո՞ր է՝ ընտանիքի բոլոր անդամներին հասանելիք գումարները փոխանցվեն միայն ընտանիքի մեկ անդամի բանկային հաշվին, նա ընդգծեց, որ ընտանիքի յուրաքանչյուր անդամ պետք է ունենա իր քարտը։

«Յուրաքանչյուր քաղաքացու համար հատկացված գումարը փոխանցվելու է իր հաշվին, այսինքն՝ բանկային քարտային հաշվի»,- ասաց նա: