Երբեք միջազգային դատարանի քրեական պրակտիկայում չի եղել, երբ երկրի գործող նախագահը փոխանցվի միջազգային քրեական դատարան․ ՔՊ պատգամավորը՝ Պուտինի հնարավոր ձերբակալման մասին

Բազմիցս ասել եմ և կասեմ․ երբեք միջազգային դատարանի քրեական պրակտիկայում չի եղել, երբ երկրի գործող նախագահը փոխանցվի միջազգային քրեական դատարան։ Այս մասին լրագրողների հետ ճեպազրույցում ասաց ՔՊ-ական պատգամավոր Վլադիմիր Վարդանյանը՝ անդրադառնալով Հռոմի ստատուտի ընդունմանը։

«Մենք որևիցե խնդիր չենք տեսնում այս փաստաթուղթը վավերացնելու առումով»,- ասաց Վարդանյանը։

Ըստ նրա, անկախ՝ կվավերացվեր ստատուտը, թե ոչ, Հայաստանի և Ռուսաստանի հարաբերություններն այնպիսին էին, որ ստատուտի 98-րդ հոդվածի 2-րդ մասի հիման վրա համապատասխան համաձայնագրի առկայությունը մշտապես օգտակար կլիներ երկկողմ հաբերությունների զարգացման համար։

Լրագրողի հարցին, թե նա ևս պնդո՞ւմ է, որ Պուտինին ձերբակալելու որևէ վտանգ չկա, նա անձեռնմխելիություն ունի, պատգամավորն նշեց, որ եթե միջազգային քրեական դատարանի կանոնադրության վավերացման հարցն է հուզում, ապա միայն այդ կոնտեքստում, չի ուզում անդրադառնալ այդ հարցին։

«Ինձ մի հարց է հուզում և շատ հստակ. մենք ունենք իրավիճակ, երբ 2020 թվականից ի վեր բախվում ենք բազում միջազգային հանցագործությունների` ռազմական, մարդկության դեմ ուղղված հանցագործությունների հետ, որոնք իրենց բնույթով հակաբարոյական են։ Այս ամենով հանդերձ, ինձ մոտ զարմանք է առաջացնում, թե ինչպես կարելի է դեմ խոսել կամ ինչ-որ վերապահումներ ունենալ մի գործիքի դեմ, որը ստեղծված է նման արարքները կանխելու և նման արարքների համար համապատասխան անձանց պատասխանատվության կանչելու համար։

Յուրաքանչյուր ինքնիշխան պետություն իրավասու է ինքը որոշել, թե որ միջազգային իրավական փաստաթուղթն է վավերացնում»,- ասաց նա։