Սննդի անվտանգության պետական ծառայությունում (ՍԱՊԾ) կաշառակերներ կան ու աշխատում են

Օրերս, ինչպես տեղեկացրել էր newspress.am կայքը, ձերբակալվել էին ՀՀ Գյուղատնտեսության նախարարության Սննդի անվտանգության պետական ծառայության երկու աշխատակից, ովքեր կաշառքի դիմաց թույլատրել են ժամկետանց սննդի իրացումը Հայաստանում:

Նշենք, որ կաշառակերության համար ձերբակալվածներից մեկին 1 մլն դրամ գրավով ազատ են արձակել, մյուսին էլ ստորագրությամբ բաց են թողել: Կաշառակերներից մեկը փոխվարչապետ Վաչե Գաբրիելյանի աներորդին էր, մյուսը` նրա ենթակա աշխատակիցը:

Թվում է, թե սա սովորական կաշառակերություն է, սակայն սա ոչ միայն կաշառակերություն է, այլ նաև կարող էր իր հետևանքներն ունենալ սպառողների լայն շերտերի վրա, առաջացնելով առողջական լուրջ խնդիրներ: Կարելի է ենթադրել, որ խոսքը գնում էր զգալի քանակով ժամկետանց սննդի մասին:
Քանի նման դեպք է գրանցվել, երբ գումար են վերցրել ստուգման ժամանակ և ժամկետանց սնունդ են թողել իրացման կետերում` պարզ չէ:

Հստակ է միայն, որ նման գործելաոճը Սննդի անվտանգության պետական ծառայությանը խորթ չէ:

Ըստ որոշ լուրերի, 2012թ-ին ՀՀ ոստիկանության կազմակերպված հանցավորության դեմ պայքարի գլխավոր վարչությունը կաշառք վերցնելու մեղադրանք է առաջադրել ՀՀ գյուղատնտեսության նախարարության սննդամթերքի անվտանգության պետական ծառայության մի քանի աշխատակիցների: Պարզվել էր, որ ՍԱՊԾ աշխատակիցները Երևանի մի շարք հացի և խմորեղենի արտադրամասերում ստուգումներ չանցկացնելու համար 2009-2012թթ. ընթացքում արտադրամասերի տնօրենների հետ պայմանավորվածություն են ձեռք բերել և տարբեր ժամանակներում տարբեր չափերի կաշառք ստացել: Չնայած սրան, կաշառակերության գործի մեջ ներգրավված մարդիկ շարունակում են աշխատել ծառայությունում նաև ՍԱՊԾ ղեկավար Արմեն Հայրապետյանի օրոք, ով կարծես կաշառակեր աշխատակցիների հանդեպ հատուկ սեր ունի:
ՍԱՊԾ-ի նման գործելաոճի արդյունք է, որ իրացման կետերում հաճախ կարելի է հանդիպել ժամեկտանց սնունդ` նոր պիտակավորմամբ: Հատկապես Ամանորին ոլորտի ՀԿ-ները ահազանգում են զգոն լինել և նման խարդախություններին զոհ չգնալ: Սակայն դժվար է զգոն լինել, քանի որ փաթեթավորված, պահածոյացված ապրանքի պիտանելիությունը, եթե ժամկետները փոխված են, դժվար է ստուգել, այդ է պատճառը, որ արդեն սննդամթերքը բացելուց պարզ է դառնում, որ սառեցված ձկնեղենը, կամ կաթնեղենը, խմորեղենները, քաղցրեղենը ենթակա չեն օգտագործման:

Քանիցս նշվել է, որ գրեթե բոլոր իրացման կետերը, հատկապես սուպերմարկետները հատուկ աշխատակիցներ ունեն, ովքեր զբաղվում են միմիայն պիտակների ժամկետները փոխելով, իսկ փոքր իրացման կետերում պիտակները փոխում են հենց խանութի աշխատակիցները: Սակայն այս խնդրին ՍԱՊԾ-ն ուշադրություն չի դարձնում: Սա արդյո՞ք չի խոսում կաշառակերության մասին, եթե չի խոսում կաշառակերության մասին, ապա ինչի՞ մասին է խոսում: Եթե իրացման կետերի նման գործելաոճը սպառողի աչքից չի վրիպում, ապա ՍԱՊԾ-ի կողմից ստուգումների ժամանակ նման խնդիրը մասնագետների աչքից չի վրիպի, ստուգումներ անցկացնելու համար պազապես ցանկություն է պետք, սակայն չգիտես, թե ինչու ՍԱՊԾ-ն համառորեն աչք է փակում ժամկետանց սննդի վերապիտակավորման խնդրի վրա:

Պարզ հարց կարող է առաջանալ, ինչո՞ւ են սննդի անվտանգության խնդիրները նման վիճակում, կառույցը կա, պետբյուջեից ֆինանսավորումը կա, իսկ սննդի անվտանգությունը իր վարքագծով վտանգում է սպառողների կյանքի անվտանգությունը: Այնպես որ, Հայաստանի սպառողները սննդի անվտանգությունը պետք է պաշտպանեն հենց Սննդի անվտանգության պետական ծառայությունից ու նրա կաշառակեր աշխատակիցներից: