Եթե ժողովուրդը որոշի` կարող է այսօր իրիկունն էլ իշխանափոխություն անել. Նիկոլ Փաշինյան (տեսանյութ)

Ում` ում, բայց ձեր խմբակցությանը «խամաճիկային կառավարություն» արտահայտությունը շատ ծանոթ է։ Այս մասին ասաց Նիկոլ Փաշինյանը ԱԺ հարցուպատասխանի ժամանակ՝ արձագանքելով «Հայաստան» խմբակցության պատգամավոր Արթուր Խաչատրյանի հնչեցրած մեղադրական հայտարարություններին։ 

«Դուք երկար տարիներ Հայաստանում ձևավորել եք խամաճիկային կառավարություն, որն ինքնուրույն ո՛չ շնչել է, ո՛չ արտաշնչել, ո՛չ հազացել է, ո՛չ էլ փռշտացել»,- ասաց Նիկոլ Փաշինյանը:

Ավելին` նա ընդդիմությանը մեղադրեց նաև Լեռնային Ղարաբաղի ժողովրդին հարվածի տակ է դնելու մեջ։

«Ես ուզում եմ հիշեցնել, թե երկու խմբակցությունով ինչպես էիք տոնում, երբ ԼՂ-ում իշխանության փոփոխություն էր տեղի ունենում, ասում էիք, որ ԼՂ ժողովուրդը ձեռքը խփել է սեղանին ու վերջապես ազգային կառավարություն է ձևավորվում ԼՂ-ում: Դուք և կողքի խմբակցության ղեկավարները շնորհավորում էիք  այդ փոփոխության կապակցությամբ, ասում էիք՝ ահա եկել է ԼՂ փրկության ժամը ու, թերևս, այն, ինչ տեղի ունեցավ, ձեր ծրագրերի մեջ էր մտնում»,- ասաց Փաշինյանը:

Նիկոլ Փաշինյանը նշեց, թե ընդդիմության պլանն այն է, որ Հայաստանը կներքաշվի պատերազմի մեջ, որի արդյունքում ԼՂ մեր հայրենակիցները Երևան գալու հնարավորություն չեն ունենա:

«Բա չե՞ք հիշում, որ ասում էիք՝ պատերազմը սկսել ա, որովհետև Նիկոլ Փաշինյանը սենց ա ասել, հետո էլ էս ա ասել, հետո էլ էն ա ասել։ Դա իմ տարբերակում գործում ա, ձեր տարբերակում չի՞ գործում»,- ասաց նա՝ հավելելով, որ այն ինչ տեղի ունեցավ՝ ընդդիմության պլանն էր։

«Հա, դուք էդ պլանին տեղյակ էիք․ բա չէի՞ք ասում՝ սենց ա լինելու, հետո էս կլինի, հետո էն կլինի․ ինչ ասեցիք՝ եղավ»,- ասաց Փաշինյանը։

Նա նշեց, թե ո՛չ ընդդիմությունը, ո՛չ էլ ուրիշ որևէ մեկը չեն որոշելու, որ ՀՀ-ում տեղի ունենա իշխանափոխություն:

«Դա որոշում է Հայաստանի ժողովուրդը, եթե ժողովուրդը որոշի` կարող  է այսօր իրիկունն էլ իշխանափոխություն  անել»,- ասաց Նիկոլ Փաշինյանը: