Արցախի հարցը կեղծ փաստարկ էր ՀՀ-ի ու Ադրբեջանի միջև «խաղաղության» պայմանագրի չստորագրման համար․ Տիգրան Աբրահամյան

Վերջին օրերին նկատելի է, որ կային որոշակի սպասումներ պայմանավորված, այսպես կոչված, «Խաղաղության» պայմանագրի ստորագրման վերաբերյալ։ Շատերի մոտ այնպիսի տպավորություն է ձևավորվել, որ Հայաստանի և Ադրբեջանի միջև խաղաղության հաստատման խնդիր կամ խոչընդոտ եղել է Արցախը և Արցախում Ադրբեջանի կողմից ուժի կիրառումից հետո այդ հարցը փաստացի լուծվել է։ Սրա հետ կապված ես ինքս բազմաթիվ հարցադրումներ եմ ստացել նաև մեր շատ լրատվամիջոցների գործընկերների հետ։ Այս մասին այսօր՝ ԱԺ ճեպազրույցների ժամանակ հայտարարեց ԱԺ «Պատիվ ունեմ» խմբակցության պատգամավոր Տիգրան Աբրահամյանը։ 

Աբրահամյանը փորձեց մեկնաբանել իր ասածը, նշելով, որ իրականությա մեջ Հայաստան-Ադրբեջան «Խաղաղության» պայմանագիրը միայն Արցախի բլոկադան չէր, այլ կան մեծ թվով խնդիրներ, որոնք, ըստ էության, Հայաստան-Ադրբեջան հարաբերություններում խնդիրներ էին առաջացնում և, բնականաբար, խոչընդոտել այդ պայամանագրի ստորագրմանը։ 

«Առաջին հիմնական խնդիրներից մեկը սահմանների ճշգրտման, այսպես կոչված, դեմարկացիայի, դելիմիտացիայի հետ կապված գործընթացն է, որի հետ կապված Հայաստանի և Ադրբեջանի  մոտեցումները բավականին տարբերվում են։ Դա պայմանավորված է նրանով, որ այս ընթացքում Ադրբեջանը փորձել է առաջ բերել տարբեր կեղծ քարտեզներ․ Ադրբեջանը որպես սկզբունք չի ուզում հիմք ընդունել մեկ քարտեզ։ Առաջ է բերում, այսպես կոչված, սկզբունքներ, որոնք որևէ ձևով իրականության կամ բանակցային հիմքում չեն կարող լինել։ Երկորդը կոմունիկացիաների ապաշրջափակման հետ կապված հարցերն են։ Ադրբեջանը սրա տակ փորձում է առաջ մղել, ասյպես կոչված, «Զանգեզուրյան» միջանցքի հանգամանքը։ Եվ, բնականաբար, այս թեման ևս մեծ խոչընդոտներ է ստեղծում Ադրբեջան-Հայաստան հարաբերություններում՝ հնարավոր ստորագրվելիք փաստաթղթերում»,-նշեց Աբրահամյանը։ 

Նրա խոսքով՝ Արցախի հարցը կեղծ փաստարկ էր ՀՀ-ի ու Ադրբեջանի միջև «խաղաղության» պայմանագրի չստորագրման համար։