Արցախի հարցով գիտեք՝ ով է ստորագրել, ինչո՞ւ եք ասում` Նիկոլ Փաշինյան, ուրիշ հարց տվեք․ Քերոբյանը շրջանցեց իրեն ուղղված հարցերը

Էկոնոմիկայի նախարար Վահան Քերոբյանը պնդում է՝ Արցախի Հանրապետության ղեկավարությունն ուներ ուրիշ անուն, երբ ստորագրվում էր փաստաթուղթ։ Արձագանքելով լրագրողի հարցին, թե՝ ինչպե՞ս կմեկնաբանի Նիկոլ Փաշինյանի ստորագրության հետևանքով Արցախում ստեղծված իրավիճակը` ասաց Քերոբյանը: 

«Գիտեք՝ ով է ստորագրել, ինչո՞ւ եք ասում՝ Նիկոլ Փաշինյան»,- ասաց էկոնոմիկայի նախարարը՝ պնդելով, որ իրեն նման հարցեր չտան․ «Ինձ տնտեսությունից հարցրեք»,- լրագրողին հորդորեց նա։

Լրագրողի դիտարկմանը, թե արցախցիներին տրամադրվել է 40 000 տեղ՝ մանկապարտեզներում ու կենցաղային անմխիթար վիճակում գտնվող պայմաններում, Քերոբյանն արձագանքեց, թե մարդկանց սնունդ է տրամադրվել։

Երբ լրագրողը պնդեց, որ խոսքն օթևանների մասին է, որի ուղղությամբ պետությունը լուրջ քայլեր չի ձեռնարկել, Քերոբյանը նշեց, որ տան վարձերի համար արցախցիներին կտրամադրվի 40 000 դրամ։

Լրագրողը հարցրեց, թե գիտի՞ Քերոբյանը, թե ուր են հասել տների գները ու անգամ գյուղական համայքներում, նման գներ չկան։

«Իմ ընկերը Փարաքյարում սեփական մեծ տուն է վարձել` 200 հազար դրամով»,- ասաց նա։

Լրագրողի հարցին, թե եթե կառավարության տրամադրած միանվագ գումարները տան տան վարձ, հետո ինչպե՞ս են ապրելու մարդիկ՝ մինչև աշխատանք գտնելն ու հունի մեջ մտնելը, Քերոբյանն արձագանքեց, թե ծրագիր կա՝ աշխատում են դրա վրա։

Ինչ ծրագիր՝ չմանրամասնեց․ շնորհակալություն հայտնեց լրագրողներին և դիմեց փախուստի։