Աղջկան գտել-բերել են ու ապացուցել, որ ո՛չ նա, ո՛չ նրա սոցցանցի զրուցակիցը լրտես չեն․ նրանց միջև այլ հարաբերությունն է եղել․ նրանք արդարացվել են․ «Հրապարակ»

«Հրապարակ»-ը գրում է․

Պետական դավաճանության կամ լրտեսության համար մեղադրվող անձինք, որոնց մասին ԱԱԾ-ն պարբերաբար սարսափազդու հաղորդագրություններ էր տարածում, մեկը մյուսի հետեւից արդարացվում են, քրեական վարույթներն էլ կարճվում են։ 

Փաստաբան Արթուր Հարությունյանը երեկ հերթական արդարացվածի մասին հայտնեց՝ սոցցանցի միջոցով։ Նրա պաշտպանյալը 44-օրյա պատերազմի ժամանակ վարորդ է եղել։ Ձերբակալվել է 2022 թվականի փետրվարին, կալանավորվել, 3 ամիս անցկացրել է կալանքի տակ։ Մոտ մեկուկես տարի քննելուց հետո քրեական հետապնդումը դադարեցվել է` մեղքն ապացուցված չլինելու պատճառով։ 

Փաստաբանը չի հայտնում իր պաշտպանյալի անունը։ Մեր տեղեկություններով՝ խոսքը Վեդիի բնակիչ Դերենիկ Թովմասովի մասին է։ Թովմասովը 20 ձերբակալված այլ զինվորականների թվում է եղել, որոնց վերաբերյալ ԱԱԾ-ն սարսափազդու եւ խայտառակիչ տեքստ էր տարածել։ 

Ներկայացվել էր, որ արտասահմանյան լրտեսները, իբր, գործակալական ցանց են ստեղծել Հայաստանում, սոցցանցերում կանանց կեղծ էջեր են բացել` հայուհիների անուններով, որ այդ կանայք ծանոթացել են մոտ 20 զինվորականի հետ, նրանց գումարներ են փոխանցել եւ դրա դիմաց ռազմական գաղտնիք պարունակող տարատեսակ տեղեկություններ են ստացել նրանցից։ Սակայն փոքր-ինչ խորանալու դեպքում հասկանում ես, որ այս մեղադրանքն ուղղակի անհեթեթություն է, եթե չասենք՝ հիմար կատակ։ 

Տվյալ դեպքում Թովմասովը սոցցանցով խոսել էր ռեալ աղջկա հետ, որն ամենեւին էլ լրտես չի հանդիսացել։ Փաստաբանական թիմը պարզել է այդ աղջկա գտնվելու վայրը, գտել է նրա հասցեն, անգամ՝ լուսանկարը ու ներկայացրել է վարույթն իրականացնող մարմնին, եւ պարզվել է, որ այդ կինն ամենեւին էլ լրտես չէ։ Այսինքն՝ փաստաբաններն արել են քննիչների եւ նախաքննական մարմնի գործը եւ ապացուցել, որ անմեղ մարդուն ապուշ մեղադրանք է առաջադրվել: 

«Դա մի լրիվ ուրիշ դեպք է եղել` այդ տղայի ու մի իքս աղջկա միջեւ հարաբերությունն է եղել, որն այս թեմաների հետ կապ չունի»,- ասում է փաստաբանը։ Մի անգամ` սկզբում, Թովմասովին կալանավորել են երկու ամսով, հետո երկարացրել են կալանքը, ապա խափանման միջոցն են փոխել։ «Հասկացան, որ այս մարդուն չեն կարող սին մեղադրանքով շարունակաբար պահել կալանքի տակ, բայց այս ընթացքում էլի քննություն էր գնում, ինչ-որ հանգամանքներ էին պարզում»,- ասում է փաստաբան Արթուր Հարությունյանը։ Այսինքն՝ մեկուկես տարի մարդուն տանջել են` ինչ-որ մեկի հիվանդ ուղեղի արգասիք մեղադրանքի պատճառով:

Փաստաբանն ասում է, որ եւս մի պաշտպանյալ ունի, որն ամբաստանյալի աթոռին է։ «Գործը դատարանում է։ Այս պահին չեմ կարող մանրամասնել, բայց, իմ գնահատմամբ, նրա մեղադրանքները եւս անհեթեթ են»,- ասում է Արթուր Հարությունյանը։ Փորձառու զինվորական Թովմասովը վիրավորվել է ՀՀ պետական մարմիններից, այդ ամենից զզված, նեղացած՝ չի ցանկացել ծառայել եւ ազատման դիմում է գրել ու հեռացել բանակից։ Հետաքրքիր է, որ գործերը հարուցվում են աղմուկով` մարդկանց աշխարհով մեկ խայտառակում են, բայց կարճվում են սուսուփուս, առանց աղմուկի, եւ ոչ մեկը չի իմանում, որ «հայրենիքի դավաճանը» ոչ թե դավաճան է, այլ իշխանությունների կողմից զրպարտված անձ։ Իրենց սխալները ՀՀ քննչական մարմինները չեն սիրում ընդունել, ներողություն խնդրել, վնասներ փոխհատուցել: Զինվորականներից՝ նույնպես։