Եթե մենք վերցնենք այդ խայծը` մեր պահանջը չի գեներացվի. Մենուա Սողոմոնյան

Մենք ինքներս պետք է փորձենք ինչ-որ խաղաքարտեր խառնել: Այս մասին այսօր՝ հոկտեմբերի 11-ին, ԱԺ-ի մոտ լրագրողների հետ զրույցում նշեց «ՀայաՔվե» նախաձեռնության անդամ Մենուա Սողոմոնյանը: 

«Եթե մենք վերցնենք այդ խայծը և ասենք, որ քանի որ Արցախն արդեն հայաթափվել է, հետեւապես իմաստ  չունի նրա իրավունքների համար պայքարել, հասարակության շրջանում այդ պահանջը չի գեներացվի»,-ասաց նա:

Ըստ Մենուա Սողոմոնյանի՝ ադրբեջանցիներն իրենց պահանջից երբեք չհրաժարվեցին և չասացին՝ քանի որ Կովսականն ադրբեջանցիներից դատարկված է, այդ հարցին չեն անդրադառնա։

«Այդ պհանջը իրենք պահեցին եւ, ի վերջո, կարողացան ինչ-որ մի ժամանակում, երբ տարածաշրջանում իրավիճակ փոխվեց, կարողացան այդ հարցը գեներացնել», - ասաց նա։

Մենուա Սողոմոնյանը անդրադարձավ նաև Հայաստանի վեկտորի փոփոխության թեմային նշեց․ «Այսօր ասում են՝ նոր մարդ ենք բերում մեր տարածաշրջան: Այդ նոր մարդուն փշերով են ընդունում տարածաշրջանում զորքով ներկայացված տերությունները: Սա  նպաստո՞ւմ է Արցախի հարցի կարգավորմանը, առհասարակ Հայաստանի անվտանգությանը: Ոչ, չի նպաստում: Հետեւաբար խելացի քաղաքականությունը պետք է զուգակցել իրավական մեխանիզմների հետ, որպեսզի հնարավոր լինի հասնել արդյունքի: Միայն իրավական մեխանիզմներով հնարավոր չէ, միջազգային իրավունքն աշխատում է միայն այն դեպքում, երբ դու կարողանում ես հողի վրա փաստի առաջ կանգնեցնել միջազգային հանրությանը, եւ միջազգային իրավունքի նորմերով դա հիմնավորել: Իսկ այդ նորմերն առկա են: Խնդիրն այն է, թե այդ մեխանիզմներն ով է գործադրողը, այդ գործադրողն ունի կամ, թե չէ, եւ առկա է դրա համար բարենպաստ միջազգային իրողություն»։