«Ժողովուրդ»․ Ինչ ունեցվածք է հայտարարագրել ՊԵԿ փոխնախագահը

«Ժողովուրդ» օրաթերթը գրում է.

«ՀՀ պետական եկամուտների կոմիտեի նախագահի տեղակալ Արթուր Մանուկյանը պաշտոնի նշանակվել է 2018 թվականի հունիսին։ Նա այն պաշտոնյաներից է, որ, թեև եղավ իշխանափոխություն, և փոփոխվեց ամբողջ կառավարական համակարգը, նա, միևնույնն է, մնաց նույն ոլորտում և չընկավ ոլորտից ոլորտ։

Նա իր կարիերան սկսել է ՀՀ պետական եկամուտների կոմիտեի մեթոդաբանության և  տեղեկատվության վարչության ուղղակի հարկերի բաժնի գլխավոր մասնագետի պաշտոնից։ Աստիճանաբար բարձրացել է, բաժնի պետ է դարձել, ապա մնալով նույն ոլորտում՝ աշխատանքի է անցել ՀՀ ֆինանսների նախարարության վարչարարության մեթոդաբանության, ընթացակարգերի և սպասարկման վարչության պետի տեղակալի պաշտոնում։

Փոխնախագահը Երևանի Քանաքեռ-Զեյթուն վարչական շրջանում հայտարարագրել է մեկ բնակարան բազմաբնակարան շենքում և ավտոտնակ, որոնք ժառանգություն է ստացել, սակայն ումից՝ Մանուկյանը չի նշել։

Հայտարարագրից տեղեկանում ենք, որ Մանուկյանն ունի նաև հիփոթեքով բնակարան Երևանի Արաբկիր վարչական շրջանում, որի մայր գումարի մնացորդը հաշվետու տարվա դեկտեմբերի 31-ի դրությամբ կազմել է 22 մլն 486 հազար դրամ։ Մանուկյանի հանձնված և վերադարձված փոխառությունները կազմել են 28 մլն 217 հազար դրամ, որը «Օրդ Դեվելոփմենթ» ՍՊԸ-ից է։ Նրա բանկային ավանդները կազմել են 5 մլն դրամ, բանկային հաշիվների մնացորդները կազմել են 1 մլն 272 հազար դրամ, կանխիկ դրամական միջոցները կազմել են 11 մլն 50 հազար դրամ և 450 դոլար։

ՊԵԿ փոխնախագահի հաշվետու տարվա եկամուտները կազմել են 30 մլն 432 հազար դրամ, որից 17 մլն 193 հազար դրամը աշխատանքի վարձատրություն է ՀՀ ՊԵԿ-ից, նա նաև 887 հազար դրամ է ստացել կրկին ՊԵԿ-ից, ըստ երևույթին, բնակարանի հիփոթեքը մարելու համար։ Նրա եկամուտների մյուս մասը եղել են վարկերը։

Ըստ հայտարարագրի՝ Մանուկյանը 11 հազար 500 դոլար հատկացրել է նվիրատվությանը, իսկ դստեր՝ Քնարիկ Մանուկյանի հայտարարագրից էլ հասկանում ենք, որ հենց իրեն էլ փոխանցված է այդ նվիրատվությունը։ Արթուր Մանուկյանը հանդիսանում է ՀՀ պետական եկամուտների կոմիտեի «Ուսումնական կենտրոն» ՊՈԱԿ-ի կառավարման խորհրդի նախագահը»։

Մանրամասները՝ թերթի այսօրվա համարում