Ադրբեջանը հիմք է տալիս մտավախության, որ Հայաստանի նկատմամբ տարածքային պահանջներ է առաջ քաշելու․ Փաշինյան

Հայաստանը բազմիցս հայտարարել է, որ ճանաչում է Ադրբեջանի տարածքային ամբողջականությունը 86 600 քառակուսի կմ-ով, իսկ Ադրբեջանի նախագահը հայտարարել է միայն, որ ճանաչում է ՀՀ տարածքային ամբողջականությունը՝ այդպես էլ չնշելով 29 800 քառակուսի կմ-ն։ Այս մասին Եվրախորհրդարանի լիագումար նիստում հայտարարեց Նիկոլ Փաշինյանը։

«Սա որոշ վերլուծաբանների մոտ մտավախություն ու հիմք է առաջացնում, թե նա  հատուկ երկիմաստություններ է թողնում Հայաստանի նկատմամբ տարածքային պահանջներ առաջ քաշելու համար»,- ասաց Փաշինյանը։

Նա նշեց նաև, որ Ադրբեջանը հայտարարել է, թե Հայաստանի ու Ադրբեջանի միջև սահման չկա, ինչը հակասում է Ալմաթիի հռչակագրին։

«Ադրբեջանը նաև երկիմաստություններ է պահում Խորհրդային Միության վերջին քարտեզները որպես դելիմիտացիայի հիմք ընդունելու հարցում, ինչը նույնպես որոշ փորձագետների հիմք է տալիս ենթադրելու, թե Ադրբեջանը Հայաստանի դեմ տարածքային  պահանջներ ներկայացնելու ու ռազմական նոր ագրեսիա նախաձեռնելու հիմքեր է ստեղծում»,- ասաց նա։

Փաշինյանը կրկին կարևորեց խաղաղությունը Հարավային Կովկասում։

«Խաղաղության մասին մեր պատկերացումները որևէ կերպ չենք հակադրում մեր տարածաշրջանի շահերին, որովհետև մեր երկիրը կարող է խաղաղ լինել, եթե խաղաղ է տարածաշրջանը։ Խաղաղության կառուցմանն աջակցելը համարում եմ իմ հիմնական քաղաքական հանձնառությունը»,- ասաց նա։