Չի կարելի թույլ տալ, որ Ադրբեջանը Հայաստանը շրջափակման մեջ պահի. Փաշինյան

Հայաստանին տարածաշրջանի տրանսպորտային կոմունիկացիաների բացմանը խոչընդոտելու մեջ մեղադրելու որևէ հիմք չկա։ Եվրախորհրդարանի լիագումար նիստում այս մասին հայտարարեց Նիկոլ Փաշինյանը։

«Կան վերլուծություններ, որ պաշտոնական Բաքուն միջանցքային խոսույթը նենգափոխում է` տարածաշրջանում նոր պատերազմ հրահրելու, Հայաստանի նորանոր տարածքներ օկուպացնելու, կամ Հայաստանը շրջափակման մեջ պահելու համար: Նման բան թույլ տալ չի կարելի»,- ասաց Փաշինյանը։

Նա նշեց, որ Ադրբեջանը շարունակաբար պնդում է, թե Հայաստանը պարտավոր է սեփական տարածքով միջանցք տալ իրեն։ 

«Միջազգային առօրյա խոսույթում ձեր ծանոթ բառապաշարով միջանցք ասելով հասկանում են պարզապես միջպետական ճանապարհներ, բայց մեր տարածաշրջանի պարագայում կա մի առանձնահատկություն՝ 2020 թվականի նոյեմբերի 9-ի եռակողմ հայտարարության մեջ միջանցք բառն օգտագործվում է միայն Լաչինի միջանցքի պարագայում, որը պետք է ապահովեր ԼՂ-ի ու ՀՀ-ի կապը»,- ասաց նա՝ հավելելով, որ ըստ այդ փաստաթղթի, Լաչինի միջանցքը ոչ միայն ճանապարհ էր, այլև՝ 5 կմ լայնությամբ տարածքային շերտ, որը պետք է լիներ Ադրբեջանի վերահսկողությունից դուրս՝ խաղաղապահների վերահսկողության ներքո:

Փաշինյանի խոսքով` Հայաստանը երբեք ոչ մի տեղ իր որևէ տարածքի նկատմամբ իր ինքիշխանության ու իրավազորության որևէ սահմանափակման չի համաձայնել, նման խոստում չի տվել։

«Հայաստանն ու Ադրբեջանն իրենց սուվերենության, իրավազորության հիման վրա, առանց միջանցքային խոսակցությունների, միմյանց համար պետք է բացեն իրենց ճանապարհները, այդ ճանապարհների անցագրային կետերում պետք է գործեն սահմանային ու այլ վերաբերելի հսկողական ծառայություններ, սա պետք է արվի փոխադարձության ու հավասարության սկզբունքով, մենք պատրաստ ենք օր առաջ գնալ այդպիսի լուծումների», - ասաց Փաշինյանը։