Օրենսդրական նախաձեռնություն՝ ուղղված շինարարական աղբի տեղափոխման նկատմամբ վերահսկողությանը

Նախագծերի փաթեթով առաջարկվում է Կառավարությանը վերապահել մթնոլորտի վրա տնտեսական գործունեության հետեւանքով առաջացած ազդեցության գնահատման կարգը սահմանելու, իսկ լիազոր մարմնին՝ այն մշակելու լիազորություններ, հստակեցնել այդ կարգով գնահատված վնասի հատուցման հետ կապված տնտեսավարողների պարտականությունները, տեղական ինքնակառավարման մարմիններին վերապահել հատուկ սահմանված երթուղով եւ հատուկ հատկացված վայրեր շինարարական աղբի տեղափոխման նկատմամբ վերահսկողությունը:

Այս մասին ասել է ՀՀ վարչապետի աշխատակազմի տեսչական մարմինների աշխատանքների համակարգման գրասենյակի ղեկավար Պետրոս Մարտիրոսյանը՝ ԱԺ հոկտեմբերի 24-ի հերթական նիստում առաջին ընթերցմամբ քննարկման ներկայացնելով ««Մթնոլորտային օդի պահպանության մասին» օրենքում փոփոխություններ եւ լրացումներ կատարելու մասին» և «Վարչական իրավախախտումների վերաբերյալ ՀՀ օրենսգրքում փոփոխություններ կատարելու մասին» օրենսդրական փաթեթը:

Նշվել է, որ երկրորդ նախագծով սահմանվում է վարչական պատասխանատվություն շինարարական աղբը համայնքի ղեկավարի սահմանած երթուղով չտեղափոխելու կամ սահմանված կարգով հատկացված վայրում այն չտեղադրելու համար: Նշված մասերով գործերի քննությունը վերապահվում է տեղական ինքնակառավարման մարմիններին եւ Ոստիկանությանը:

Պատգամավորների հարցերն առնչվել են ոլորտում առկա խնդիրներին: Ի պատասխան կարեւորվել է այն հանգամանքը, որ փաթեթով ոլորտի պատասխանատվությունը դրվում է տեղական ինքնակառավարման մարմինների վրա, եւ հստակեցվում է այդ պատասխանատվության շրջանակը:

Գլխադասային հանձնաժողովի դրական եզրակացությունը ներկայացրել է ԱԺ տարածքային կառավարման, տեղական ինքնակառավարման, գյուղատնտեսության եւ շրջակա միջավայրի պահպանության հարցերի մշտական հանձնաժողովի նախագահի տեղակալ Արեն Մկրտչյանը:

ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նախագահ Սիսակ Գաբրիելյանը կարեւոր է համարել պատասխանատվության խստացման անհրաժեշտությունը: