Հայաստանի տնտեսական աճը նաև Սնուպ Դոգի համերգի և նման միջոցառումների ծախսերի շնորհիվ է` Հայաստանն ապահով ներկայացնելու առումով. Ալեն Սիմոնյան

Դուք ինձ հարցրե՞լ եք` ես Սնուպ Դոգի համերգի հետ հա՞շտ եմ: ես անձամբ կարծում եմ, որ եթե կառավարությունը գումար է հատկացնում նման համերգի համար, ապա այդ համերգը պետք է լինի բաց: Այս մասին այսօր Ազգային ժողովում լրագրողների հետ զրույցում ասաց ԱԺ նախագահ Ալեն Սիմոնյանը` պատասխանելով հարցին, թե ինչպես է ստացվում, որ նախկին իշխանություններին ճոխ ծախսերի համար քննադատողներն այսօր հաշտ են կառավարության կողմից Սնուպ Դոգի համերգը կազմակերպելուն ուղղված գումարը ծախսելու հետ: 

«Ես չգիտեմ` կազմակերպիչներն իմ այս կարծիքին ոնց կվերաբերվեն, բայց ես կարծոում եմ, որ կայանալիք համերգը, որը պետք է տեղի ունենա, եթե տեղի ունենա, պետք է տեղի ունենա բաց. եթե պետությունը փող է տալիս, դա պետք է լինի բաց»,- ասաց Սիմոնյանը:

Լրագրողի ճշտող հարցին, թե ինչ է նշանակում «բաց» ասվածը` Աժ նախագահն ասաց. «Սնուպ Դոգը Հայաստանի Հանրապետության Ազգային ժողովի նախագահի հետ քննարկման հարց եկեք չդարձնենք: Ինչ վերաբերում է ծախսերին. ՀՀ ծախսերը, որն արվում է, որևիցե կերպ չի անդրադառնում այն առաջին անհրաժեշտության ծախսերի վրա, լինի դա բանակը, լինի սոցիալական ծախսերը: Դուք տեսնում եք, որ հենց մենք եկել ենք իշխանության, աշխատավարձերը բարձրանում են, թոշակները բարձրանում են, բանակը կառավարությանը դիմելուց «չէ» բառ չի ստանում: Ինչ վերաբերում է Ձեր ասած և մնացած միջոցառումներին, չնայած նրան, որ Հայաստանը պատերազմական դրության մեջ է, մենք ունենք տնտեսական աճ, իսկ տնտեսական աճն այդպիսի ծախսերի շնորհիվ է` տուրիստների ներգրավման, Հայաստանը գրավիչ դարձնելու առումով, Հայաստանն ապահով ներկայացնելու առումով: Ես խնդրում եմ, որ բացասական կողմից տեսնել դրական կողմը»,- ասաց Սիմոնյանը: