Մանվել Խնձրցյանը՝ ազատ ոճային ըմբիշների՝ աշխարհի փոխչեմպիոն

Հայաստանի ազատ ոճի ըմբշամարտի երիտասարդական հավաքականի ներկայացուցիչ, 57 կգ քաշային Մանվել Խնձրցյանը դարձավ Մ23 ԱԱ-ի արծաթե մեդալակիր։ Հայտնում է armsport-ը։ 

Խնձրցյանը դուրս էր եկել Մ23 տարեկանների ԱԱ-ի եզրափակիչ՝ կիսաեզրափակչում 13-3 հաշվով առավելության հասնելով Մոնղոլիայի ներկայացուցչի նկատմամբ:

Այսօր՝ հոկտեմբերի 25-ին, հայ ըմբիշն ԱԱ-ի հաղթողի կոչումը վիճարկեց ռուսաստանցի Նաչին Մոնգուշի հետ: Գոտեմարտն ավարտվեց Մոնգուշի հաղթանակով՝ 11։0 հաշվով։

Խնձրցյանը Մ23 ԱԱ-ում պայքարը սկսել է 1/8 եզրափակչից, որտեղ 11:0 հաշվով առավելության է հասել ԱՄՆ ներկայացուցիչ Կուպեր Ֆլինի նկատմամբ, քառորդ եզրափակչում հայ ըմբիշը 2:1 հաշվով ուժեղ է գտնվել գերմանացի ըմբիշից:

Հիշեցնենք, որ Հայաստանի ներկայացուցիչ Մեժլում Մեժլումյանը երեկ բրոնզե մեդալ էր նվաճել մինչև 23 տարեկանների Աշխարհի առաջնությունում: