Մենք պատրաստ ենք աշխատել Հայաստանի և Ադրբեջանի հետ, որպեսզի Հարավային Կովկասում երկարաժամկետ խաղաղություն հաստատվի․ Վրաստանի վարչապետ

Վրաստանի վարչապետ Իրակլի Ղարիբաշվիլին հայտարարել է, որ Թբիլիսին պատրաստ է Բաքվի և Երևանի հետ համատեղ քայլերի՝ տարածաշրջանում խաղաղության հաստատման համար: Այս մասին հայտնում է TACC-ը։

Նրա խոսքով՝ վրացական կողմը Հայաստանին և Ադրբեջանին համարում է բարեկամ պետություններ։

«Մենք պատրաստ ենք աշխատել մեր հարևանների և բարեկամների՝ Հայաստանի և Ադրբեջանի հետ, վերջապես Հարավային Կովկասում երկարաժամկետ խաղաղություն հաստատելու համար»,- ասել է Ղարիբաշվիլին։

TACC-ը հիշեցնում է, որ «սեպտեմբերի 19-ին Ադրբեջանի պաշտպանության նախարարությունը հայտարարեց Արցախում տեղական «հակաահաբեկչական գործողություն» սկսելու մասին։ Գերատեսչությունում նշել են, որ գործողության նպատակը կլինի ճնշել «լայնածավալ սադրանքներն» Արցախում, ինչպես նաև հայկական բանակի ստորաբաժանումների զինաթափումն ու դուրսբերումը տարածաշրջանից։ Հաջորդ օրը ՌԴ պաշտպանության գերատեսչությունը հայտարարեց, որ պայմանավորվածություն է ձեռք բերվել Արցախի և Բաքվի ուժերի միջև։

Գործողության ավարտից հետո, Ադրբեջանը Հայաստանին կոչ է արել «խաղաղության» պայմանագիր կնքել, որի շուրջ կողմերը 2023-ի սկզբից ակտիվ աշխատանքներ են տանում։ Մասնավորապես, նրանք պայմանավորվել են միմյանց տարածքային ամբողջականության փոխադարձ ճանաչման շուրջ։ Երևանը պաշտոնապես համաձայնել է Արցախը համարել Ադրբեջանի մաս։ Միևնույն ժամանակ, Հայաստանը նշել է, որ կողմերը դեռևս չունեն փոխըմբռնում մի շարք առանցքային հարցերի շուրջ»,- գրում է գործակալությունը։