Փախստականներին կենսաթոշակ տրվում է անվերապահ, բոլոր դեպքերում. իրավաբանական գիտությունների դոկտոր

Կենսաթոշակի և մի շարք այլ սոցիալական իրավունքներ ծագում են իրավունքի ուժով՝ փախստականի կարգավիճակ ձեռք բերելու պահից, ինչը իմպերատիվ ամրագրված է «Փախստականների և ապաստանի մասին» օրենքի 23-րդ հոդվածի 1-ին մասով: Այս մասին ֆեյսբուքյան իր էջում գրել է իրավաբանական գիտությունների դոկտոր Գևորգ Դանիելյանը:

Նա, մասնավորապես գրել է.

«Տևական ժամանակ անց արցախահայությանը, վերջապես, վերապահվեց փախստականի կարգավիճակ: Արդարադատության նախարարության ներկայացրած նախագծերը միանգամայն իրավաչափ էին, սակայն անհասկանալիորեն սեփական անհիմն մեկնաբանություններով հանդես եկող Կառավարության անդամներ (Խաչատրյան, Միրզոյան), որոնք աղավաղեցին ողջ փաթեթի գաղափարը, պնդելով, թե իբր կենսաթոշակի իրավունքը կծագի ՀՀ քաղաքացիություն ձեռք բերելուց հետո:

Կենսաթոշակի և մի շարք այլ սոցիալական իրավունքներ ծագում են իրավունքի ուժով՝ փախստականի կարգավիճակ ձեռք բերելու պահից, ինչը իմպերատիվ ամրագրված է «Փախստականների և ապաստանի մասին» օրենքի 23-րդ հոդվածի 1-ին մասով: Իսկ «Փախստականների կարգավիճակի մասին» կոնվենցիայի 24-րդ հոդվածի 1-ին մասի «բ» կետի «ii» ենթակետի համաձայն, եթե ընդունող երկրում կենսաթոշակներ տրվում է հիմնադրամներից, ապա փախստականներին այն տրվում է պետական բյուջեից, այսինքն՝ կենսաթոշակ տրվում է անվերապահ, բոլոր դեպքերում: 

Հ.Գ. Հուսանք, որ այս պաշտոնյաների, ըստ էության, ոչ պաշտոնական մեկնաբանությունները հետևանք չեն ունենա...»: