Ցավոք, միայնակ մենք դա անել չենք կարող․ Մամիջանյան

Եթե ՀՀԿ-ն ունակ լիներ միայնակ հեռացնել Փաշինյանին, մենք դա վաղուց արած կլինեինք, շատ վաղուց: «Եռաբլուր» զինվորական պանթեոնում լրագրողների հետ զրույցում ասաց ԱԺ «Պատիվ ունեմ» խմբակցության ղեկավար Հայկ Մամիջանյանը։

«Ցավոք, միայնակ մենք դա անել չենք կարող: Այստեղ ընդդիմության հարցը չէ, արդեն հայրենասերների հարցն է: Հայրենասերները հիմա հուսահատության, հուսալքության մեջ են, բայց արդարությունը պահանջում է, որ Փաշինյանն ու իր խմբակն իրենց դատաստանը ստանան և իրենք դա ստանալու են։ Ես դա խոստանում եմ, բայց չեմ կարող ժամանակ նշել»,- ասաց Մամիջանյանը։

Հարցին՝ «հոկտեմբերի 27»-ի առանձնացված մասի վերաբացումն ի՞նչ նպատակ ունի՝  հանրության ուշադրությունը շեղելու համա՞ր է, թե՞ կարող է ինչ-որ իրադարձությունների վրա լույս սփռել, Մամիջանյանը պատասխանեց. «Այս իշխանություններն ունակ են ցանկացած ոճրագործություն, արհավիրք, ցանկացած ծանր, դառը, ցավոտ իրադարձություն փորձեն օգտագործել իրենց կեղտոտ խաղերի համար։ Իրենք երբեք ոչ մի դեպքում հետաքրքրված չեն արդարադատության, իրականության, որևէ ճշմարիտ բան բացահայտելու մեջ։ Իրենց դա չի հետաքրքրում, այլ հետաքրքրում է իրենց իշխանությունը, աթոռը պահելը, մի քանի հայի ավելի շատ խաբելը, որպես արդյունք մեր երկրի համար ավելի մեծ վտանգ ստեղծելը։ Ես այս հարցում իրենցից որևէ ակնկալիք չունեմ»։