Անլուրջ է հեռուստատեսությամբ տարածել, որ ինչ-որ մի գործողություն ես արել, հետո հաջորդ օրը պարզվի, որ ոչ մի բան էլ չես արել․ Տիգրան Ավինյան

Երևանի քաղաքապետ Տիգրան Ավինյանը գործակարգավորական խորհրդակցության ժամանակ հայտարարեց, թե իրեն մի հարց է հուզում։ Նա հանրային հեռուստաընկերության առաջին ալիքով տեսել է՝ կապված Գյուլբենկյան-Ավետիսյան խաչմերուկում գործող բենզալցակայանի հետ։

«Գնացին, պլոմբեցին, սիրուն լենտերով փաթաթեցին, հետո հաջորդ օրվանից այդ նույն բենզալցակայանը սկսեց աշխատել»,-ասաց Ավինյանը։ Այժմ նրան հետաքրքրում է, թե ինչու այդ գործառույթն իրականացնելուց հետո բենզալցակայանը պետք է աշխատեր։

Իրավաբանական վարչության պետ Տարոն Մարգարյանը հայտնեց, որ համայնքի կողմից այդ ինքնակամ շինության ապամոնտաժումը հնարավոր չի եղել, քանի որ դատարանը հայցի ապահովման միջոց է կիրառել և արգելվել է քանդելը, մինչև դատական գործի ավարտը, բայց տեղեկություն չունի, թե բենզալցակայանը գործունեությունը վերսկսել է, թե ոչ:

Քաղաքապետի տեղակալ Սուրեն Գրիգորյանն էլ նշեց, որ, անկախ քանդման աշխատանքից, տեսչական մարմնի գործընկերների հետ պետք է քննարկվի կապարակնիքն ինքնակամ վերացնելու պատասխանատվության հարցը:

«Բենզալցակայանը պետք է քանդվի, բայց եթե այս պահին հնարավոր չէ, կապարակնիքն ինքնակամ հեռացնելու համար պետք է համապատասխան պատասխանատվություն նախատեսվի»,- հայտարարեց Սուրեն Գրիգորյանը:

«Պրակտիկ խնդիրն այն է, որ ամբողջ աշխարհին հայտնում ենք, որ էս մի բենզալցակայանը կապարակնքվել է և այլևս չի աշխատելու՝ հաջորդ օրվանից իրենք սիրուն այդ կապարները հանում են ու սկսում են բենզին լցնել  այդ բենզալցակայանում»,- արձագանքեց Ավինյանը:

Նա հայտարարեց, որ տեսչական մարմնին պետք է խնդրեն միջոցներ կիրառել:

«Անլուրջ ա հեռուստատեսությամբ տարածել մի տեղեկատվություն, որ ինչ-որ մի գործողություն ես արել, հետո՝ հաջորդ օրը պարզվում է, որ ոչ մի բան էլ չես արել»,-հայտարարեց Երևանի քաղաքապետը: