Եվրոպական կառույցները բաց տեքստով ասում են՝ Նիկոլը մեր տղան է, ինչպես՝ Զելենսկին. Նաիրա Զոհրաբյան

ԱԺ նախկին պատգամավոր Նաիրա Զոհրաբյանն ԱՄՆ դեսպանին առաջարկում է ընտանիքով տեղափոխվել և ապրել «ժողովրդավարության փարոս» Հայաստանում։ Նա այս մասին ասաց Արմեն Աշոտյանի գործով ընթացող դատական նիստից առաջ՝ դատարանի բակում լրագրողների հետ զրույցի ժամանակ՝ արձագանքելով դեսպանի որակմանը, թե՝ «Հայաստանը ժողովրդավարության փարոս է» Հարավային Կովկասում։

«ԱՄՆ դեսպանին մաղթում եմ, որ իր հարազատներն անցնեն այսպիսի շինծու քրեական գործերով»,- ասաց Զոհրաբյանը։ 

Նա վերջերս է վերադարձել  եվրոպական կառույցներում հանդիպումներից և վստահեցնում է՝ չկա որևէ կառույց, որը չընդունի, որ Արմեն Աշոտյանը քաղբանտարկյալ է։

«Մասնավոր զրույցներում ասում են, թե ճիշտ կլինի, որ Արմեն Աշոտյանի գործն արագ ավարտվի և գնա եվրոպական դատարան, որովհետև այնտեղ փլվելու է այս ամբողջ «բլեֆը»։ Բայց երբ հարցնում ես, թե ինչո՞ւ եվրոպական կառույցները ձայն չեն հանում, երբ մարդը կալանավորվում է, իրենք բաց տեքստով ասում են՝ Նիկոլը մեր տղան է, ինչպես՝ Զելենսկին, ինչպես Սաակաշվիլին էր, և որևէ «մառոլ որոճող» միջազգային կառույցները որևէ ծպտուն չեն հանելու, քանի դեռ Նիկոլ Փաշինյանն իրենց պետք է տարածաշրջանում իրենց գծած ճանապարհային քարտեզն իրականացնելու համար», - ասաց Նաիրա Զոհրաբյանը։