Եթե մեր հայրենասիրության  կոնցեպտը դրա վրա է հիմնված, մենք շատ հեռու չենք  գնա․ Ժաննա Անդրեասյանն ասաց, թե որտեղ կլինի «Ակադեմիական քաղաք»-ը

Ակադեմիական քաղաքի տարածքները նախատեսվելու են 16 բուհի համար․ այդտեղ բնակվելու և աշխատելու է մոտ 44 հազար մարդ։ Այս մասին «ՀՀ 2024 թվականի պետական բյուջեի մասին» ՀՀ օրենքի նախագծի նախնական քննարկումներին ասաց ԿԳՄՍ նախարար Ժաննա Անդրեասյանը՝ անդրադառնալով «Ակադեմիական քաղաք» ծրագրին։

Նա տեղեկացրեց, որ ակադեմիական քաղաքում կլինեն հանրակացարաններ, որտեղ ուսանողները կկարողանան շատ մատչելի պայմաններով կամ, գուցե, անվճար բնակվել:

«Ես գտնում եմ, որ սա էականորեն բեռնաթափելու է քաղաքը, որովհետև մենք շատ մեծ ծավալի գործունեություն տեղափոխելու ենք երևանամերձ տարածք Երևանի կենտրոնում իրականացնելու փոխարեն»,- նշեց Անդրեասյանը:

Նա չի կիսում այն տեսակետը, թե ծրագիրը կարող է Երևան «քաշել» երիտասարդներին ու դատարկել մարզերը։

Ըստ Ժաննա Անդրեասյանի` պետք է կարևորել ոչ թե կրթության վայրը, այլ որակը։

«Պետք է դադարենք մտածելուց, որ երբ մարդը ստանում է կրթություն մի վայրում, այլևս չի վերադառնա իր բնակավայր։ Եթե մեր հայրենասիրության  կոնցեպտը դրա վրա է հիմնված, մենք շատ հեռու չենք գնա։ Պետք է կարողանանք սերմանել այն միտքը, որ կարևոր է դառնալ լավ մասնագետ, վերադառնալ քո բնակավայր ու օգտագործել քո ստացած գիտելիքն ու հմտությունը։ Կարծում եմ՝ դրան պետք է ուղղված լինի մեր քաղաքականությունը»,- ասաց Անդրեասյանը։

Նա նաև հայտնեց, որ հոկտեմբերի 30-ի դրությամբ ունեն կնքված պայմանագրեր. նախագծման արժեքը  գլխավոր հատակագծի մշակման մասով կազմելու է մինչև 854 հազար 100 եվրո։

Նախարարը հիշեցրեց, որ «Ակադեմիական քաղաքի» տեղադիրքի համար նախատեսվում են երկու տեղամասեր` Երևան քաղաքի 17-րդ թաղամասին հարակից տարածքը, որն ավելի քան 600 հեկտար է և պահեստային տեղամասը՝ Համո Բեկնազարյանի անվան «Հայֆիլմ» կինոստուդիայի տարածքը:

«Ընդհանուր առմամբ, շուրջ 700 հեկտարի մասին ենք խոսում, հնարավոր է գլխավոր հատակագծի մշակման աշխատանքներում պարզ դառնա, որ միայն հիմնական տեսամասը բավարար է մեր ամբողջ նախագծվելիք ենթակառուցվածքը ստանալու համար»,- ասաց նախարարը։