ՀՀԿ-ի հետ կոալիցիայի շնորհիվ ՀՅԴ-ն ստացել է «Երևան» ձուլվածքով նստարանների բիզնեսը. (տեսանյութ)

Դեռ մի քանի տարի առաջ, երբ Երևանի քաղաքապետարանի «թողտվությամբ ու ձեռամբ» «Երևան» ձուլվածքով նստարաններ և նույնաոճ աղբամանների պատրաստման «պատիվը» շնորհվեց «Նիկոլ Դուման» առևտրային կազմակերպությանը՝ մեծ աղմուկ բարձրացավ, քանի որ դրանք, որքան էլ գեղեցիկ էին, այնուամենայնիվ իրենց արժեքին համահունչ չէին:

Այսպես, 2015 թվականի տվյալներով` հիշյալ նստարանների թիվը մայրաքաղաքում հասել է 3000-ի, իսկ աղբամանների թիվը` 2000-ի: Ընդ որում՝ յուրաքանչյուր նստարանը՝ 165 000, իսկ աղբամանը՝ 77 000 դրամ արժողությամբ:

Ասացեք խնդրեմ, ի՞նչ է նշանակում մեկ աղբամանի համար վճարել 77 հազար դրամ մի երկրում, որտեղ աղքատության ցուցանիշը կազմում է 35 տոկոս, մի երկրում, որտեղ նվազագույն աշխատավարձը կազմում է 55 հազար դրամ, մի քաղաքում, որտեղ լուծված չեն առաջնային լուծում պահանջող ու կենցաղային նշանակություն ունեցող մի շարք խնդիրներ: Էլ չեմ խոսում, որ 165 հազար դրամանոց նստարան պատրաստող վարպետի ամսական աշխատավարձը չի գերազանցում 150 հազար դրամը: Եվ, ի վերջո, հետաքրքիր է՝ որևէ մի կառույց, կոչվի դա Վերահսկիչ պալատ, թե պարզապես վերահսկող, ուսումնասիրե՞լ է արդյոք, թե որքա՞ն են իրականում արժեցել քաղաքում շարված նստարաներն ու աղբամանները Տարոն Մարգարյանի վրա և համապատասխանում է արդյո՞ք քաղաքապետի ներկայացրած թվերը` փաստաթղթային տվյալներին:

Ի՞նչ է սա` թալան, աչքկապոցի, խնայողություններ երևանցիների բազում չլուծված խնդիրների ու նյարդերի հաշվին, թե պարզապես հերթական «ատկատների» մեխանիզմ, որի միջոցով փորձում են հարստանալ Հանրապետականն ու Դաշնակցությունը: Այսինքն, այն կուսակցությունները, որոնք այսօր փորձում են կոալիցիա կազմել:

Չնայած նրան, որ «Նիկոլ Դուման»-ի առաջարկած մեկ նստարանի գնին քաղաքապետարանը կարող էր մեկ այլ կազմակերպության պատվիրել ամենաքիչը երկու նստարան, սակայն ընտրվել է հենց այս տարբերակը, քանի որ «Նիկոլ Դուման»-ը Դաշնակցության ընկերություն է, և թքած, որ իր քաղաքի բնակչությանն այս միքտը դուր չէր գա:

Նկատենք, որ «Նիկոլ Դուման» ընկերության ղեկավարներից մեկը` Կառլեն Գևորգյանը, ՀՀ քաղաքաշինության նախարարի նախկին տեղակալ, ԱԺ ընտրություններում թիվ 12 ընտրատարածքում մեծամասնականով առաջադրված ՀՅԴ անդամ է: Իսկ իշխող կուսակցության և «Նիկոլ Դուման»-ի համագործակցությունը սկսվել է դեռ այն ժամանակ, երբ ՀՅԴ-ն կոալիցիայի անդամ էր:

Ասել է թե` հանրապետական քաղաքապետ Տարոն Մարգարյանն այս գործընկերությունը ժառանգել է իր նախորդներից:

Այնպես որ, Դաշնակցությունը որքան էլ փորձի ընդդիմություն խաղալ` պարզից էլ պարզ է, որ նրա, կառավարման համակարգում կամ կոալիցիայի կազմում ընդգրկվելու ցանկությունն, ինքնանպատակ չէ: Սա հնարավորություն է ձեռքը երկարել ու ամենահամեղ պատառը բերանը տանել: