«Հայաստանի ժողովրդական արտի՞ստ». ժամանակն է այս և նմանատիպ «մտավորականներին» անվանել «ուստա»

ՀՀ պաշտպանության նախկին փոխնախարար Արտակ Զաքարյանը անդրադարձել է Ժողովրդական արտիստ Նիկոլայ Ծատուրյանի՝ Արցախի հարցով ստեղծված իրավիճակի մեկնաբանմանը։

Հիշեցնենք՝ Ծատուրյանը հարցազրույցներից մեկում նշել էր․ «Այ մարդ, ես ի՞նչ գործ ունեմ Արցախի հետ, է: Ինձ հետ գործ չունեք»։

«Հետաքրքիր է, ի՞նչ կասեին Հովհաննես Թումանյանը, Վահրամ Փափազյանը, Մարտիրոս Սարյանը, Ալեքսանդր Սպենդիարյանը, Հովհաննես Շիրազը, Եղիշե Չարենցը, Սիլվա Կապուտիկյանը, Հրանտ Մաթևոսյանը, Վիկտոր Համբարձումյանը, Դերենիկ Դեմիրճյանը, Վիլյամ Սարոյանը և մեր մյուս երևելիները, եթե կարդային այս խայտառակությունը:

Երևի թե կասեին « էսքանից հետո ու՞մ տանձին է պետք քո բեմադրությունը»:

Եթե սովետական տոտալիտար հասարակությունում, որևէ մեկն իրեն այսպիսի արտահայտություն թույլ տար` հայ մտավորականության բոլոր շերտերը (ականավոր մաթեմատիկոսից մինչև հայտնի կոմպոզիտոր) նրան անարգանքի սյունին կգամեին:

Հ.Գ.-Հայաստանի «ժողովրդական արտի՞ստ»:

Դատելով հայ «մտավորականներից» շատերի անհաղորդ կեցվածքից` հիմա հասկանում եմ, թե ինչու են ուզում չեղարկել տարատեսակ գործիչների կոչումները: Ժամանակն է այս և նմանատիպ «մտավորականներին» անվանել «ուստա»»-, գրել է Արտակ Զաքարյանը։