Անմնացորդ ծառայելու եմ համայնքի ողջ ազգաբնակչությանը, անկախ նրանց քաղաքական կողմնորոշումից. Մալաթիա-Սեբաստիայի նորանշանակ թաղապետ

Սիրելի հայրենակիցներ, Մալաթիա-Սեբաստիա վարչական շրջանի արժանապատիվ բնակիչներ, ողջունում եմ ձեզ և երախտագիտության խոսք հղում այն ընտրողներին, ովքեր վստահելով «ՀԱՆՐԱՊԵՏՈՒԹՅՈՒՆ» կուսակցությանը, հնարավորություն ընձեռեցին, որ Երևանի քաղաքապետի ընտրություններում մեր կուսակցությունն ունենա 26236 քվե, որի արդյունքում նախընտրական ցուցակից 8 հոգի դարձան ավագանու անդամներ: Այս մասին հայտարարություն է տարածել Մալաթիա-Սեբաստիա վարչական շրջանի նորանշանակ ղեկավար Ռոնմիկ Մխիթարյանը: 

«Այդ ցուցակի 5-րդ տեղը զբաղեցնում էի ես: Երևանի նորընտիր քաղաքապետ Տիգրան Ավինյանի հրամանով՝ նոյեմբերի 1-ից նշանակվել եմ Մալաթիա-Սեբաստիա վարչական շրջանի ղեկավար:

Ցանկանում եմ ձեզ տեղեկացնել, որ անկախ այն հանգամանքից, թե թվով քանի բնակիչ է իր վստահության քվեն տվել մեր կուսակցությանը, ես ստանձնելով շրջանի ղեկավարի պաշտոնը, վստահեցնում եմ, որ անմնացորդ ծառայելու եմ համայնքի ողջ ազգաբնակչությանը, անկախ նրանց քաղաքական կողմնորոշումից: Իմ հնարավորության ու կարողության սահմաններում հետամուտ եմ լինելու լուծել ձեզ մտահոգող և հրատապ լուծում պահանջող բազմաթիվ խնդիրներ, այդ թվում՝ մշակութային, կրթական, սոցիալ-տնտեսական, աշխատանքային, բնապահպանական, կոմունալ-կենցաղային: Լինելով արցախյան ազատամարտի կամավոր զինվոր, և հրամանատար, մեծագույն ցանկությամբ ու նպատակասլացությամբ շարունակելու եմ անշեղ պահել իմ մարտական ընկերոջ՝ Մալաթիա-Սեբաստիա վարչական շրջանի նախկին թաղապետ, արժանահիշատակ Վահան Զատիկյանի անցած փառավոր ճանապարհը՝ ծառայել hայրենիքին անմնացորդ, վստահել ժողովրդին անվերապահորեն և արժանապատվորեն ձեռք բերել մարդկանց սերն ու վստահությունը: Հավատանք ասված խոսքին, խոսքը դարձնենք գործ և ծառայենք մեր հայրենիքին, պահենք ու պահպանենք ունեցածը, թերին շտկենք, պակասն ավելացնենք, բնությունը պահպանենք, բակն ու փողոցը, շենքն ու դպրոցը պահենք մաքուր ու կոկիկ և շենացնենք աշխարհասփյուռ հայության մայրաքաղաք Երևանն իր տասներկու համայնքներով:

Շնորհակալություն Երևանի քաղաքապետ Տիգրան Ավինյանին՝ ինձ վստահելու համար, շնորհակալ եմ ձեզ՝ ինձ հույսով տոգորելու ու հավատ ներշնչելու համար, և հետայսու անչափ շնորհակալ կլինեմ, եթե միմյանց հանդեպ փոխադարձ հարգանքով և փոխըմբռմամբ՝ շարունակենք մեկտեղել մեր հետագա աշխատանքային գործունեությունը:

Ի գործ՝ հանուն մեր երկրի ներկայի և հանուն պայծառ գալիքի, հանուն հասարակության բարեկեցիկ կենսակերպի ու արժանապատիվ կյանքի:
Բարին ընդ ձեզ: Թող կապույտ մնա ՀԱՅԱՍՏԱՆԻ երկնակամարը, այգաբացները լինեն արևաշող, իսկ մեր երկրի սահմաններն՝ անվտանգ ու ապահով»: