Հայաստանի իշխանության մատը խառն է Արցախի ցեղասպանական ակտի մեջ, որտե՞ղ է գրված, որ 070 կոդը ճամփորդական է, էս ի՞նչ սուտ է․ նախկին ՄԻՊ

2013թ.-ին Բրիտանիայի պատգամավորը Եվրապառլամենտում ադրբեջանցու հարցին, թե դուք ինչո՞ւ չեք գրում, որ Հայաստանն օկուպացրել է Լեռնային Ղարաբաղը, ինչպես գրում եք, որ Ռուսաստանն օկուպացրել է Աբխազիան և Հարավային Օսեթիան, շատ պարզ պատասխանել է` Եվրապառլամենտում չկա ընկալում, որ Հայաստանն օկուպացրել է Լեռնային Ղարաբաղը: Այս մասին այսօր լրագրողների հետ զրույցում ասաց նախկին ՄԻՊ Լարիսա Ալավերդյանը: 

«Ավելին, պատգամավորն ասել է, որ մենք գիտենք, որ շատ քիչ մարդ կա Լեռնային Ղարաբաղում, որ չունի Հայաստանի քաղաքացիություն: Այնինչ, այսօր հապճեպ ընդունվում է որոշում, որն արցախցիների մեծ մասը չի հասկանում, ասում են` մենք արդեն քաղաքացի ենք, ինչո՞ւ պիտի նորից քաղաքացիություն ընդունենք: Որովհետև այս երկրի իշխանությունը զավթած խումբը չի դիտարկում արցախցիներին որպես ցեղասպանություն վերապրած մարդիկ, դա միջազգային պրակտիկայում ընդունված տերմինոլոգիա է, այն է՝ Genocide survivors, որովհետև նրանք վերապրել են ցեղասպանություն: Ինչո՞ւ չի անում` որովհետև իր մատը խառն է այս ցեղասպանական ակտի մեջ: Եթե խառը չլիներ, կընդունե՞ր այդպիսի որոշում` իհարկե, ոչ: Ի՞նչ է նշանակում՝ դու տարիներ շարունակ քաղաքացիություն ունեցող մարդկանց ասում ես, որ դա ընդամենը ճամփորդական փաստաթուղթ է: Էս ի՞նչ սուտ է: ԼՂՀ-ն ուներ միջազգային համագործակցություն, իր գործընկերներին: Ո՞ւր է այն փաստաթուղթը, որտեղ գրված է, որ 070-ը ճամփորդական է: Բա կարելի՞ է երկիրը բերել այն աստիճան դեգրադացիայի, որ բանավոր խոսքերով մերժել 150 հազար (ներառյալ 44-օրյա պատերազմի տեղահանվածները) արցախցիների: Այդ բոլոր շրջանների տարածքները, նույն այդ մարդու ասած, չեն ընկալվում Հայաստանի կողմից օկուպացված, որովհետև ցանկացած գրագետ դիվանագետ գիտի, որ այդ տարածքները միջազգային իրավունքի առումով չեն պատկանում Ադրբեջանին: Արցախը կայացել է Ադրբեջանին չպատկանող տարածքների վրա: Մենք չունենք մի փաստաթուղթ, որտեղ նշվում է, որ Հայաստանն է ճանաչում Լեռնային Ղարաբաղն Ադրբեջանի մաս, դա ասել է մեկ անձ` չունենալով ոչ մի հիմք»,- ասաց Ալավերդյանը։