ՔՊ-ական Գագիկ Մելքոնյանն իր տղային ուզում է ՔԿԾ պետ «կարգել»
2022 թվականի հուլիսի 5-ին, իր ծննդյան 36-րդ տարեդարձին, Սերգեյ Ատոմյանը, ով այն ժամանակ դեռ Քրեակատարողական ծառայության (ՔԿԾ) պետ էր, Նիկոլ Փաշինյանից նվեր ստացավ` գեներալական ուսադիրների տեսքով:
Դրանից մեկ տարի անց` 2023-ի օգոստոսի 5-ին, արդեն նրան մեկ այլ «փաթեթավորմամբ նվեր» էր սպասում. Փաշինյանն ազատեց նրան ՔԿԾ պետի պաշտոնից, որն Ատոմյանն զբաղեցնում էր 2021 թվականի սեպտեմբերի 15-ից։
Մամուլում շրջանառվող լուրերի համաձայն` ազատման պատճառը եղել է այն, որ Սերգեյ Ատոմյանը թույլ է տվել Դավիթ Տոնոյանին տեսակցել իր մոր հետ:
Սա խիստ բարկացրել է Փաշինյանին, ու նա հրահանգել է անհապաղ ազատել Ատոմյանին:
Ատոմյանն, իհարկե, հերքել է այս մասին տեղեկությունը, սակայն փաստն այն է, որ այսօր նա հեռացված է, իսկ աթոռը` արդեն «աճուրդի» դրված:
NEWSPRESS.am-ի տեղեկություններով` այս պաշտոնը փորձում է իրենով անել ԱԺ պատգամավոր, ՔՊ-ական Գագիկ Մելքոնյանի որդին` Արման Մելքոնյանը:
Նա, ի դեպ, անմիջականորեն կապված է Ատոմյանին պաշտոնանկ անելու դեպքի հետ: Ավելի կոնկրետ՝ նախկին նախարարի հետ կատարված դեպքի առթիվ, «Երևան-Կենտրոն» քրեակատարողական հիմնարկի` ԱԱԾ մեկուսարանի պետ Արման Մելքոնյանի նկատմամբ կարգապահական տույժ` «խիստ նկատողություն» է կիրառվել ծառայողական լիազորությունները վերազանցելու համար:
Նկատենք, որ Արման Մելքոնյանը ՔՊ-ական պատգամավորի որդին լինելուց բացի, մեկ այլ «հայտնի ՔՊ-ական», Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի հովանավորյալն է:
Մեր տեղեկություններով` Մելքոնյան-Քոչարյան տանդեմը մտադիր է Արման Մելքոնյանին դարձնել ՔԿԾ պետ` Ատոմյանի փոխարեն:
Այս գործը գլուխ բերելու համար, իհարկե նրանց հնարքներ են հարկավոր, քանի որ փաստացի` Ատոմյանն աշխատանքից ազատվել է նույն դեպքի առիթով, ինչի համար կրտսեր Մելքոնյանը նկատողություն է ստացել:
Ամեն դեպքում, ամենայն հավանականությամբ, Գագիկ Մելքոնյանը հետ չի կանգնի իր հեռահար նպատակներից...
Հիշեցնենք, որ ավելի վաղ NEWSPRESS.am-ն անդրադարձել էր այն բանին, որ իրականում Սերգեյ Ատոմյան ՔԿԾ պետի պաշտոնից ազատվել է մաքսանենգ ճանապարհով ծխախոտ արտահանելու պատճառով:
Արմինե Մկրտումյան
