Եթե Ադրբեջանը չմերժի բրյուսելյան սկզբունքները, առաջիկայում կկնքվի «խաղաղության պայմանագիր»․ Փաշինյան

Հայկական կողմը հույս ունի, որ առաջիկա ամիսներին կստորագրի խաղաղության պայմանագիր Ադրբեջանի հետ։ Այդ մասին ասել է Նիկոլ Փաշինյանը` Փարիզի «Խաղաղության 6-րդ համաժողովի» պանելային քննարկման ժամանակ․

«Մենք հույս ունենք, որ առաջիկա ամիսներին կստորագրենք խաղաղության պայմանագիր Ադրբեջանի հետ՝ հիմնվելով Բրյուսելում կայացած բանակցություններում համաձայնեցված երեք սկզբունքների վրա»,- մանրամասնել է Փաշինյանը։

«Առաջին սկզբունքով Հայաստանն ու Ադրբեջանը լիովին ճանաչում են միմյանց տարածքային ամբողջականությունն ու ինքնիշխանությունը՝ հիմնվելով այն գիտակցության վրա, որ Հայաստանի տարածքը զբաղեցնում է 29,800 կմ2, իսկ Ադրբեջանինը՝ 86,600 կմ2 տարածք։

Երկրորդ սկզբունքը ենթադրում է՝ Հայաստանն ու Ադրբեջանը հաստատում են իրենց անվերապահ հավատարմությունը 1991թ. Ալմա-Աթայի հռչակագրին՝ որպես սահմանազատման քաղաքական շրջանակ:

Երրորդ սկզբունք՝ տարածաշրջանում տրանսպորտային և տնտեսական կապերի ապաշրջափակման ապագա տրանսպորտային կարգավորումները հարգելու են բոլոր երկրների ինքնիշխանության, իրավազորության, փոխադարձության և հավասարության սկզբունքները»։

Վարչապետ Փաշինյանը նշել է, որ այս սկզբունքների շուրջ պայմանավորվածություն է ձեռք բերվել Բրյուսելում՝ Ադրբեջանի նախագահի հետ բանակցությունների ընթացքում․ «Այդ պայմանավորվածություններն արձանագրվեցին Եվրոպական խորհրդի նախագահ Շառլ Միշելի հայտարարություններում՝ 2023 թվականի մայիսի 14-ի և հուլիսի 15-ի եռակողմ հանդիպումներից հետո»,- ասել է Փաշինյանը։