Արշակ Կարապետյանը Հյուսիսային պողոտայում գրասենյակ է բացել․  «Հրապարակ»

 «Հրապարակ» թերթը գրում է․ 

«ՀՀ պաշտպանության նախկին նախարար Արշակ Կարապետյանը մեկ ամիս առաջ հանդես եկավ ուղերձով, հրապարակային մեղադրանքներ հնչեցրեց իշխանությունների հասցեին և ազդարարեց քաղաքական շարժում սկսելու մասին։ Իշխանությունները, դատելով արձագանքներից, որոնք դեռ չեն լռել, խիստ անհանգստացան այս հայտնությունից: Ու չնայած այդ մի եզակի «բեմելն» էր, սակայն ՔՊ-ականները շարունակում են նրան պատասխանել: Օրերս էլ Անդրանիկ Քոչարյանը Հ1-ում անդրադարձավ` հիշելով, թե ինչի համար է նրան Սերժ Սարգսյանը ժամանակին ազատել ՊՆ հետախուզության պետի պաշտոնից, և չարախնդաց, թե Կարապետյանն ինչպես  հայտնվեց, այնպես էլ անհետացավ: Կարապետյանի համախոհ Գևորգ Գևորգյանն ասում է՝ Կարապետյանը չի անհետացել, ակտիվ աշխատանքներ է տանում՝ իր նախաձեռնած շարժումը կյանքի կոչելու համար: Ճիշտ է` դեռ չի վերադարձել Ռուսաստանի Դաշնությունից, սակայն Երևանում և ՀՀ որոշ մարզերում արդեն գրասենյակներ է բացել, կենտրոնական գրասենյակն էլ Հյուսիսային պողոտայում է։  

Հիշեցնենք․ ՀՀ ԶՈւ հետախուզության վարչության նախկին պետ, 2018-2021 թթ․ ՀՀ վարչապետի խորհրդական, ՀՀ ԶՈւ ԳՇ պետի նախկին առաջին տեղակալ, նախկին նախարար Արշակ Կարապետյանի հայտարարած «Հանուն Հայաստանի փրկության շարժման» ակտիվ մասնակիցներից մեկն ազատամարտիկ Գևորգ Գևորգյանն է, ով շաբաթներ առաջ մեզ հետ զրույցում ասել էր, թե իր «Ազգային ճակատ»-ով միանում է նոր ստեղծվող շարժմանը, և ամեն ինչ անելու են՝ գործող իշխանություններին հեռացնելու համար։

«Շարժումն այժմ ձևավորման փուլում է, աշխատանքներ են տարվում տարբեր ուղղություններով, այդ թվում՝ պետական ոլորտի զարգացման մեր ծրագիրն է կազմվում։ Որպեսզի շարժումը հասնի հանգուցալուծման, պետք է լավ նախապատրաստվել, միայն հրապարակներ մարդկանց հանելով, բեմեր բարձրանալով, հայտարարություններ անելով չէ։ Ո՞ւմ է պետք մարդկանց փողոց հանել, հետո մարելը»,- երեկ ասաց նա։ Գևորգյանի համոզմամբ՝ պետք է դասեր քաղել անցած հինգ տարիների ձախողված փորձերից․ «Հիմա գրասենյակներ են բացվում, ծրագրեր կազմվում, որոնց մասին շատ շուտով կիմանաք։ Իրական մեծ թիմ, մարդիկ են աշխատում, ես կասեի՝ լավագույնները, որոնք ոչ միայն լավագույն մասնագետներ են, այլև հանուն մեր պետության նվիրված անձինք, և փորձելու ենք մեր տեսլականը ներկայացնել, թե ինչպես ենք տեսնում պետության և պետականության պահպանումը, անվտանգության, խաղաղության ձևավորումը, տնտեսության իրական զարգացումը»: Գևորգ Գևորգյանը, սակայն, համառորեն անուններ չի տալիս՝ ասելով, թե այդ մարդիկ իրենք կհայտարարեն․ «Շատերը հանրությանը հայտնի և նրա կողմից ընդունված մարդիկ են, և ամենակարևորը՝ նրանք մարդիկ են, որ առաջնորդվում են ոչ թե անհատներով, այլ՝ Աստծով»։

Նշենք, որ Արշակ Կարապետյանը Մոսկվայում է, իր առաջին տեսաուղերձն էլ Մոսկվայից էր ուղղել հայ հասարակությանը: Գ. Գևորգյանին հարցրինք․ «Դրսից հայրենիքի «փրկիչները» կարո՞ղ են լայն զանգվածների վստահությունը շահել»։ Նա ասաց, որ շուտով Կարապետյանը կվերադառնա Հայաստան, բացի այդ` մեծ սփյուռք ունենք դրսում․ «Այսինքն՝ սփյուռքն է՞լ չի կարող․․․ Ոչ, բոլորն այս գործում պետք է իրենց ներդրումն ունենան։ Մենք ամբողջ օրը նախաձեռնող խմբով այստեղ ենք հանդիպում-քննարկում, Արշակ Կարապետյանն այնտեղ՝ Մոսկվայում, և համատեղ միասնական ճակատ է ստեղծվելու, որի մասին ես արդեն ասել եմ՝ քանդելու ենք բոլոր սև ու սպիտակները և առաջնորդվելու ենք Աստծով, լինելու է համահայկական պայքար։ Մենք շոու չենք անելու, ձևական հայտարարություններ չենք անելու, մեր նպատակը երկրի փրկությունն է, այն, ինչի համար մարդիկ տարիներ շարունակ փողոց են դուրս գալիս, բայց Նիկոլը շարունակում է իշխել՝ ընդդեմ մեր պետական շահի։ Հետևաբար, պետք չէ շտապել, ավելի լավ է մեկ անգամ գործել և՝ վճռական»։

Մեր հարցին՝ չե՞ք ուշանա․ մինչև այս տեմպերով որոշեք պետությունն ու պետականությունը փրկել, կարող է ամեն ինչ ավարտված լինել։ Գևորգյանն ասաց․ «Մենք ուշացել ենք այն ժամանակ, երբ Նիկոլը եկավ իշխանության, իսկ հիմա պայքարը շարունակվում է, ու պետք է փրկել պետությունն ու պետականությունը»։

Մանրամասները՝ թերթի այսօրվա համարում։