Ասել, որ այս նախագծով երիտասարդներն ազատվում են ծառայությունից՝ սխալ կլինի․ Հայկ Սարգսյան

Ասել, որ այս նախագծով երիտասարդներն ազատվում են ծառայությունից՝ սխալ կլինի։ Այս մասին ասուլիսի ժամանակ ասաց ՔՊ խմբակցության պատգամավոր Հայկ Սարգսյանը՝ ներկայացնելով իր հեղինակած օրենքի նախագիծը, որով հնարավորություն է տրվում 27 տարին լրացած և պարտադիր զինվորական ծառայություն չանցած քաղաքացիներին ազատվել քրեական պատասխանատվությունից՝ վճարելով 15 մլն դրամ։

Հայկ Սարգսյանը բացատրում է՝  օրենքի ընձեռած հնարավորությամբ նրանք չեն ազատվում պարտադիր զինվորական ծառայությունից, այլ ազատվում են քրեական պատասխանատվության ենթարկվելուց։

«Այսինքն` ասել, որ սրանով մեր համաքաղաքացիները կխուսափեն ծառայությունից, չի համապատասխանում իրականությանը, քանի որ նրանք այսօր արդեն մեծ ցանկության դեպքում անգամ չեն կարող ծառայել։ Նրանք ունեն միայն մեկ տարբերակ՝ դատապարտվել ազատազրկման՝ մինչև 5 տարի ժամկետով։ Իմ ներկայացրած նախագիծը նպատակ ունի այդ քաղաքացիներին տալ հնարավորություն չդատապարտվելու` ծառայելու կամ գումար վճարելու դիմաց ազատվելու քրեական պատասխանատվությունից»,- ասաց նա։

Հայկ Սարգսյանը չի հերքում, որ ինչպես նախկինում, այսօր էլ կան կոռուպցիոն ռիսկեր, երբ գումարի միջոցով զորակոչիկն ազատվում է ծառայությունից, բայց մի բան է, երբ այդ ամենը կատարվում է ծածուկ, այլ բան, երբ դրա մեջ ներգրավված են եղել պետական կառավարման գործիչներ։

«Առաջիկայում հարցը քննարկենք և, եթե հնարավոր է, գումարի չափը կնվազի, բայց ոչ էական չափով։ Սակայն, ես հակված եմ, որ բոլորովին չծառայելու դեպքում արժեքը մնա նույնը՝ 15 մլն դրամ։ Հնարավոր է 1 ամիս ծառայեն, հետո գումարը նվազեցնենք, պետք է այնպես անեք, որ խրախուսենք, որպեսզի գոնե մեկ ամիս ծառայեն»,- կարևորեց Սարգսյանը՝ հավելելով, որ ամեն դեպքում անելու են այնպես, որ երիտասարդները ծառայությունից չխուսափեն։