Ինչու Հայաստանը չի մասնակցում ՀԱՊԿ նիստին. ԱԽ քարտուղարի պարզաբանումը

ՀՀ Անվտանգության խորհրդի քարտուղար Արմեն Գրիգորյանը Հանրային Հ/Ը-ի «Հարցազրույցում» մեկնաբանել է, թե ինչու է Հայաստանը մերժում ռուսական բոլոր հարթակները, չի մասնակցում ՀԱՊԿ Հավաքական անվտանգության խորհրդի նիստին․

«Հայաստանը բազմաթիվ հարցեր ունի ՀԱՊԿ-ին ուղղված, որոնց պատասխանները չի ստանում։ Մենք ՀԱՊԿ-ից չենք ստացել անհրաժեշտ օգնությունը մեր սուվերեն տարածքը պաշտպանելու համար։ Մինչ այժմ չունենք այդ հարցերի պատասխանը, և սա է նաև պատճառը, որ չենք մասնակցում ՀԱՊԿ  նիստին»,- ասել է նա:

Հարցին, թե նիստերին չմասնակցելով արդյո՞ք Հայաստանը ստանում է հուզող հարցերի պատասխանները, Գրիգորյանը նշել է․

«Նիստերին չմասնակցելը դեմարշ չի կոչել, հարցերի պատասխաններ կան, որոնք չեն ստանում։ Մենք ունենք հարցեր ՀԱՊԿ-ի վարքագծի հետ կապված և ակնկալում ենք, որ այդ հարցերի պատասխանները մեր գործընկերները կտան»։

Նա նաև հավելել է, որ ՀԱՊԿ-ից դուրս գալու հարց օրակարգում չկա։ Հարցին՝ եթե ՀՀ-ն չի մասնակցում ՀԱՊԿ-ի աշխատանքներին, ապա ինչու դուրս չի գալիս կառույցից, ԱԽ քարտուղարը ասել է․

«Մենք կարծում ենք, որ սա լավագույն տարբերակն է շարունակելու մեր քաղաքականությունը»։

«Որևէ խնդիր չեմ տեսնում, որ մենք չենք մասնակցում որևէ միջոցառման ՀԱՊԿ-ի շրջանակներում, այդպես էլ կարող է պատահել»,- ընդգծել է Գրիգորյանը։

Հիշեցնենք՝ այսօր հայտնի դարձավ՝ Նիկոլ Փաշինյանը չի մասնակցի ՀԱՊԿ նիստին: