Լոլիկի ցեցի պատճառով 22 տոննա լոլիկի ներկրումը Հայաստանից ՌԴ արգելվել է

Վերջին տարիներին Արմավիրի, Արարատի, նաև Կոտայքի մարզերում ինչպես բաց գրունտում, նաև ջերմատներում տարածում էր ստացել մորմազգի ցեց հիվանդությունը: Այն ժամանակ Սննդի անվտանգության պետական ծառայության Բուսասնիտարիայի տեսչության պետ Արթուր Նիկոյանը կարտոֆիլի ցեցի դեմ առաջարկում էր պայքարել գյուղացիներին` զինվել տեղեկատվական թերթիկներով:

Իսկ թե ինչպես է պայքարել ՍԱՊԾ-ն կարտոֆիլի ցեցի դեմ, դժվար է գնահատել, քանի որ կառույցի գործողությունները այդ ընթացքում այնքան էլ թափանցիկ չէին, իսկ որ նման պայքար առանձնապես չի էլ իրականացվել, դրա վկայությունն է այն, որ ՀՀ-ից 22 տոննա լոլիկի արտահանումը ՌԴ Ռոսսելխոզնադզորն արգելել է հենց ցեցի պատճառով, որը եղել է ակտիվ վիճակում:

Այս տարիներին լոլիկի արտադրությունը Հայաստանում կտրուկ կրճատվել է, իսկ թե որքան, Գյուղատնտեսության նախարարությունը կոնկրետ պատասխան չի տալիս, քանի որ կրճատումները զգալի են, իսկ Գյուղնախարարությունը սիրում է խոսել աճերի և հաջողությունների մասին, բայց  կարտոֆիլի ցեցի հետևանքների մասին` ոչ:

Կարող ենք հավելել, որ վերջին մեկ-երկու տարվա ընթացքում քիչ էր խոսվում մորմազգիի ցեցի մասին, նախ լոլիկի մշակությունն էր կրճատվել, լոլիկ չկար, որ ցեցը վնասեր, իսկ մշակվող տարածքներում լոլիկի վրա ավելի քան ակնհայտ էին ցեց հիվանդության նշանները:
Սպառողներին արդեն հայտնի էր, որ լոլիկի վրա կային մի քանի սև կետեր, որտեղ ցեցն էր տարածված և շուկայում հիմնականում լոլիկը նման խնդիր ուներ: Բայց քանի որ այս տարի լոլիկի արտադրությունը զգալիորեն նվազել էր, ապա սպառողները հաճախ էին աչք փակում լոլիկի սև կետերի վրա:

ՍԱՊԾ-ն չկարողացավ պայքարել ցեցի դեմ, քանի որ ՍԱՊԾ-ն մատների արանքով էր նայում այդ խնդրին: ՌԴ-ն Հայաստան չէ, որ սահմանին առանց բուսասանիտարական ստուգումների ներկրումներ թույլատրի, այնպես, որ Գյուղատնտեսության նախարարության, Սննդի անվտանգության պետական ծառայության անփութության և անտարբերության հետևանքով ևս մեկ անգամ Հայաստանի գյուղատնտեսական արտադրանքին հարված է հասնում: Նշենք, որ հատկապես ջերմոցատերերը խոսում էին, որ թուրքական լոլիկի ներկրումով ցեցը հայտնվեց Հայաստանում, իսկ թե 22 տոննա լոլիկի ինչ խմբաքանակ է արտահանվել, պարզ չէ, քանի որ չի բացառվում, որ Թուրքիայից ներկրված լոլիկ է վերարտահանվել, քանի որ ձմռան շրջանում ջերմոցատերերն են փոքր քիչ լոլիկ մշակում, հիմնականում խոշորները: Հիմա թե թուրքական վերարատահանված լոլիկ է եղել, թե խոշոր ջերմոցատերերի արտադրած լոլիկը, պարզ չէ:

Նշենք նաև, որ ավելի ուշ Ռոսսելխոզնադզորի կայքում ևս մեկ տեղեկություն հայտվեց, թե ներողություն են խնդրում ավելի վաղ տարածած այն տեղեկության համար, ըստ որի, Հայաստանի Հանրապետությունից ներկրված լոլիկների մեջ հայտնաբերվել է հարավ-ամերիկյան լոլիկի ցեց: Կասկած կա, որ այդ խմբաքանակն ուղարկվել է այլ երկրից` կեղծ փաստաթղթերով: Ներկայումս, ըստ Ռոսսելխոզնադզորի, ընթանում է փաստաթղթերի ստուգում:
Կարող ենք հավելել, որ տեղեկության նման փոփոխությունը կասկածելի է, քանի որ ներկրման և արտահանման դեպքերում կեղծ փաստաթղթերի առկայությունը նվազագույնի է հասցվում:

Այնպես որ, այս պարգայո՞մ էլ ԶԼՄ-ներն են մեղավոր: Ոլորտի համար պատասխանատու կառույցները ցուցադրական են աշխատում, արդյունքում հեղինակազրկվում է հայրենի գյուղարտադրանքը: