Վրաստանի ԱԳՆ-ն մեկնաբանել է Ֆրանսիայից Հայաստան զենքի մատակարարումները

Վրաստանի արտգործնախարար Իլիա Դարչիաշվիլին մեկնաբանել է Ֆրանսիայից Վրաստանի տարածքով Հայաստան զենքի մատակարարումը։ Վրացական հանրային հեռուստաալիքի «Ազատ հայացք» հաղորդաշարի հաղորդավարը նշել է, որ Վրաստանի տարածքով Ֆրանսիայից Հայաստան զրահատեխնիկա մատակարարելու մասին տեղեկությունը տարածվել է ադրբեջանական, ապա վրացական լրատվամիջոցներում։

ԱԳ նախարարը նշել է, որ Վրաստանը երկու երկրներին էլ հնարավորություն է տալիս հավասար պայմաններով օգտվել տարանցիկ գործառույթից։

«Վրաստանի դիրքորոշումն այն է, որ երկու երկրներին էլ հնարավորություն ընձեռվի օգտվելու մեր տարանցիկ գործառույթից հավասար պայմաններով։  Յուրաքանչյուր երկիր պաշտպանական ուժեր ունենալու իրավունք ունի։ Երկրներն իրավունք ունեն ձեռք բերել սովորական զենք ու զինամթերք, որն արգելված չէ միջազգային պայմանագրերով։ Վրաստանի դիրքորոշումն այն է, որ երկու երկրներին էլ հնարավորություն ընձեռվի օգտվելու մեր տարանցիկ գործառույթից հավասար պայմաններով»,- ասել է նախարարը։

Հիշեցնենք, որ ավելի վաղ Վրաստանի Փոթի նավահանգստում հաստատել են Ֆրանսիայից Վրաստանի տարածքով ռազմական տեխնիկայի առաքումը Հայաստան։