Ադրբեջանն արևմտյան հարթակներում Հայաստանից «պոկեց» այն, ինչ իրեն պետքն էր. այդ հարթակներից այլևս ստանալու ոչինչ չունեն. Արթուր Խաչատրյան

Բյուջեն զուտ հաշվապահություն չէ, քաղաքականություն է: Որ ոլորտն ավելի մեծ նշանակություն ունի Կառավարության համար, այդ ոլորտն ավելի շատ գումար է ստանում: Մենք տեսնում ենք, որ 16 տոկոս բյուջեի աճի պայմաններում Պաշտպանության նախարարության համար նախատեսված պաշտոնական ծախսերը կավելանան ընդամենը 7 տոկոսով, ռազմարդյունաբերության ոլորտում մեկ միլիարդով նվազում են հատկացումները, և փոխարենը ոստիկանության համար նախատեսված բյուջեի աճը կկազմի 18 տոկոս. ավելի շատ, քան ընդհանրապես պետական բյուջեի աճը, և գրեթե երեք անգամ ավելի շատ, քան Պաշտպանության նախարարության համար նախատեսված հատկացումները: Նոյեմբերի 17-ին կայացած խորհրդարանական ճեպազրույցների ընթացքում անդրադառնալով խորհրդարանում տեղի ունեցած պետական բյուջեի քննարկումներին` ասաց ՀՀ ԱԺ «Հայաստան» խմբակցության պատգամավոր Արթուր Խաչատրյանը:

Նրա դիտարկմամբ տնտեսական բոլոր հաշվարկները խիստ մանիպուլյատիվ բնույթ ունեն, և ցանկացած տեղեկություն ներկայացվում է այնպիսի անկյան տակ, որը Կառավարության գործունեությունը կդարձնի դրական և երկրի զարգացմանը միտված:

Անդրադառնալով Վաշինգտոնում նոյեմբերի 20-ին նախատեսված արտգործնախարարների մակարդակով հանդիպմանն Ադրբեջանի չմասնակցելու հարցին` Արթուր Խաչատրյանը նշել է, որ Ադրբեջանը հրաժարվում է ոչ միայն ԱՄՆ միջնորդության բանակցություններից, այլև ԵՄ միջնորդությունից: Ըստ Արթուր Խաչատրյանի` նրանք արևմտյան հարթակներում Հայաստանից «պոկեցին» այն, ինչ իրենց պետքն էր. այդ հարթակներից այլևս ստանալու ոչինչ չունեն:

Հարցի առնչությամբ «Հայաստան» խմբակցություն  քարտուղար Արծվիկ Մինասյանը ևս ներկայացրել է իր դիրքորոշումը` ընդգծելով, որ միջազգային` հատկապես արևմտյան հարթակը, բացարձակ չի արձագանքում Հայաստանում տիրող ակնհայտ հակաժողովրդավարական վիճակին: Նրա խոսքով` հարցն ամբողջականության համակարգի  մեջ պետք է դիտարկել: «Ադրբեջանն այսօր իր բոլոր գործողություններով` ամենաբռնապետական, հակաժողովրդավարական երկրներից մեկն է, սակայն նույն եվրոպական ատյաններից այդ մասին որեւէ արձագանք չենք լսի, որովհետև Ադրբեջանի տնտեսական շահը գերադասելի է ցանկացած իրավիճակից»,- ասել է խմբակցության քարտուղարը:

Լրագրողը մատնանշելով 2018 թվականի համեմատ 2024 թվականի բյուջեով եկամտային մասի կրկնապատկման փաստը, ծախսային մասով էական ավելացումները, առողջապահության համար նախատեսված ծախսերի կրկնապատկումը` հետաքրքրվել է` արդյո՞ք ընդդիմությունն էլ մանիպուլյատիվ չի ներկայացում փաստերը: Արթուր Խաչատրյանի դիտարկմամբ ամենաարագ ՀՆԱ-ի աճի տեմպերը, ըստ Վիճակագրական կոմիտեի տվյալների, հաստատ, այդ վերջին հինգ տարիներին չեն եղել: