ՌԴ պատվիրակությունը չի եկել Երևան, քանի որ Փաշինյանը հրաժարվե՞լ էր ներկա լինել ՀԱՊԿ գագաթնաժողովին

Հարցին, թե հնարավո՞ր է, որ ՌԴ պատվիրակությունը չի մասնակցում ԵԱՀԿ աշնանային նստաշրջանին, քանի որ Նիկոլ Փաշինյանը հրաժարվել էր ներկա լինել ՀԱՊԿ գագաթնաժողովին, Խանդանյանը պատասխանց, թե` մեկը մյուսի հետ կապ չունի։ 

 

Պատգամավորն անտեղի համարեց երկու միջոցառումների միջև զուգահեռը, քանի որ խոսքը տարբեր ձևաչափերի մասին է՝ մի դեպքում գործադիր նիստ է, իսկ սա խորհրդարանական հարթակ է։ Նա շեշտեց, որ հայկական պատվիրակությունը մասնակցում է խորհրդարանական այլ հարթակներին, որոնցում Ռուսաստանը ներկայացված է, օրինակ, ԱՊՀ Խորհրդարանական վեհաժողովի աշխատանքներին, որն անցկացվում էր Բիշքեկում:

 

«Ես իրականում չգիտեմ, թե ինչ պատճառով ՌԴ պատվիրակությունը չի ժամանել։ Դրա համար պատճառ չեմ տեսնում։ Պետք է նաև խոստովանեմ, որ մեր մի շարք եվրոպացի գործընկերների կողմից, չեմ ասի ճնշումներ, բայց ազդակներ եղել են ՌԴ պատվիրակության մասնակցության վերաբերյալ, որովհետև, օրինակ, Կանադայում, Մեծ Բրիտանիայում տեղի ունեցած նստաշրջանների ժամանակ երկրները վիզաներ չէին տրամադրել ռուս պատգամավորներին, բայց Հայաստանի դեպքում ռուս պատվիրակները նման խնդիր չունեն»,- նշեց Խանդանյանը։

 

Հարցին, թե արդյոք դա անհարգալից վերաբերմունք չէ՝ հաշվի առնելով, որ ՌԴ-ն ԵԱՀԿ կարևոր երկրներից է և ԵԱՀԿ ՄԽ համանախագահ, նա պատասխանեց՝ սա նաև խոսակցության հարթակ է, և Ռուսաստանի պատվիրակության համար հնարավորություն էր գալ, դիրքորոշումները ներկայացնել ԵԱՀԿ տարածաշրջանում ստեղծված իրավիճակի վերաբերյալ։

 

«Անհարգալից վերաբերմունք է, թե ոչ`  ես կարող էի ասել, եթե պատճառներին ծանոթացած լինեի»,- ասաց Խանդանյանը