Ապօրինի ծագում ունեցող շուրջ 1000 անշարժ ու 200 շարժական գույք է բռնագանձվել. հայցագինը՝ 500 միլիարդ դրամ. Գլխավոր դատախազ

ՀՀ գլխավոր դատախազ Աննա Վարդապետյանը Կառավարության նիստի ժամանակ ներկայացրեց, թե մինչ այս պահը քանի հայցադիմում է ներկայացվել ապօրինի գույքի բռնագանձման վերաբերյալ։

Դատախազը ներկայացրեց նաև Աբովյան 3 հասցեում գտնվող ԱՕԿՍ-ի հայտնի շենքի նկատմամբ պետության սեփականության իրավունք վերականգնման մանրամասները։ Կառավարության որոշմամբ՝ այն ամրացվել է Տարածքային կառավարման և ենթակառուցվածքների նախարարության Պետական գույքի կառավարման կոմիտեին՝ հետագա օգտագործման համար․ «Այն ժամանակին մասնավորեցված է եղել, և, ինչպես իրավապահ մարմիններն են պարզել, ապօրինի կերպով է մասնավորեցված եղել։ Ապօրինի գույքի բռնագանձման գործընթացի շրջանակներում վերադարձվել է պետությանը»։

Վարդապետյանի խոսքով՝ գույքը մի քանի տասնյակ անգամ ավելի թանկ է․ շուկայական արժեքը 1,5 միլիոն դրամ է, ներկայումս այն մի քանի անգամ գերազանցում է այդ թիվը։ Ըստ նրա՝ Կառավարության որոշմամբ առաջարկվում է ԿԳՄՍ-ին եռամսյա ժամկետում հանձնարարական առաջադրել շենքի ներսում գտնվող շարժական գույքի տնօրինման հետ կապված, քանի որ կան մշակութային արժեք ներկայացնող գույքեր։

«ԱՕԿՍ-ի շենքը ապօրինի ծագում ունեցող բռնագանձման վարչության շրջանակներում չէ, բայց մինչ այս պահը ներկայացվել է 963 հայցադիմում, դրանով պահանջում ենք բռնագանձել շուրջ 1000 անշարժ գույք, 200 շարժական գույք, 270 իրավաբանական անձի մասնակցություն։ Ընդհանուր հայցագինը, որը մենք ներկայացրել ենք, գերազանցում է 500 միլիարդ դրամը։ Կնքվել է հաշտության 4 համաձայնություն, որոնցով պետությանը վերադարձվել է 4 անշարժ և մեկ շարժական գույք՝ ընդհանուր 2 միլիարդ 100 միլիոն դրամ արժեքով և 79 միլիոն դրամ։ Դրա մեջ ներառված են «Եռաբլուր» զինվորական պանթեոնի տարածքում 4 հողամասերը, հողամասերի շուկայական արժեքները ևս ենթակա են լրացուցիչ գնահատման»,- նշեց նա։

Վարդապետյանը նաև մանրամասնեց՝ 2023 թվականին եղել են մի քանի վճիռներ․ Ծաղկաձորի անտառների 5500 քառակուսի մետրի վերաբերյալ, որոնց նկատմամբ սեփականության իրավունքն արդեն պատկանում է ՀՀ-ին, «Գոլդեն Փլես» հյուրանոցի 17 հազար 77 ամբողջ 6 քառակուսի մետրով հողամասի նկատմամբ վճիռ, որով բավարարվել է ՀՀ-ին վերադարձնելու փաստը, այս գործը, սակայն, բողոքարկվել է և 2024 թվականի փետրվարին, և նորից հարցը քննության առարկա է դառնալու, վիճարկվելու է Մանկական աշխարհ նախկին հանրախանութի շենքը, Պուշկինի երկու հասցեում գտվող շենքը, Վարդավառ զբոսայգում ինքնակամ շինությունների օրինականացումը, մի շարք զբոսայգիներ, Մոսկվա կինոթատրոնի և նկարիչների միության պահպանման գոտում ոչ ենթակա տարածքի վերաբերյալ հայտնի Կումայրի հուշարձան հանդիսացող տարածքի նկատմամբ, երիտասարդական պալատի Սարալանջի մեկ հասցեում գտնվող շենքի հողատարածքը, Բաբայան և Ուլնեցի հատվածում գտնվող հողամասի օտարման հարցը։

Ընդհանուր առմամբ՝ պետական և համայնքային շահերի պաշտպանության գործընթացում մոտ 235 հայց է իրականացվել։