Որքան էլ Փաշինյանը հղում անի Պուտինի հետ իր լավ հարաբերություններին՝ ՌԴ-ի հետ խիստ լարվածություն կա․ Արթուր Խաչատրյանը՝ Լարսում տիրող իրավիճակի մասին
Հայ տնտեսվարողները հերթական անգամ կանգնել են խնդրի առաջ ու իրավունք ունեն ակնկալել, որ այն կառավարությունը, որն ապրում է տնտեսվարողներից գանձած գումարների հաշվին՝ պետք է լուծի տնտեսվարողների կարիքները։ Այս մասին ԱԺ-ում լրագրողների հետ զրույցի ժամանակ ասաց «Հայաստան» խմբակցության պատգմավոր Արթուր Խաչատրյանը՝ անդրադառնալով Լարսում ստեղծված իրավիճակին, որտեղ հայկական բեռնատարները չեն կարողանում անցնել սահմանը։
Նրա դիտարկմամբ, այն, որ հայ արտահանողներն ու տնտեսվարողները, արդեն որերորդ անգամ կանգնել խնդրի առաջ, ցույց է տալիս, որ նաև այս հարցում ու տնտեսական ոլորտում, կառավարությունը մեծ հաջողություններով հպարտանալ չի կարող։ Ընդդիմադիր պատգամավորի համար նման իրավիճակը Լարսում կանխատեսելի էր։
«Այս քայլը Ռուսաստանի կողմից պատահական չէր, սա նրա կողմից որոշակի ուղերձ էր»,- ասաց Արթուր Խաչատրյանը։
Նա նշեց, որ Վրաստանի կողմից որևէ խնդիր չկա, խնդիրը միայն Լարսում է։
Պատգամավորի դիտարկմամբ` այնպես չէ, որ միայն ՀԱՊԿ գագաթաժողովին չմեկնելու հետևանքով է, որ Ռուսաստանն ուղերձներ է հղում, նրա խոսքով, իշխանության կողմից եղել են նաև բավականին շատ հայտարարություններ, որոնք ՌԴ-ի իշխանություններին դուր չեն եկել։
«Ակնհայտ է, որ որքան էլ Փաշինյանն ասի, թե հարաբերությունները ՌԴ հետ շատ լավ են ու հղում կատարի Պուտինի հայտարարություններին՝ իրականում հարաբերությունները խիստ լարված են։ Դա չի կարող իր անդրադարձը չունենալ նաև հանրային տրամադրությունների վրա։ Ակնհայտ են դրանք»,- ասաց Արթուր Խաչատրյանը։
