Բյուջե փող լցնողներն էս մարդիկ են՝ կանչե՞լ են նրանց, խոսացե՞լ են այդ մասին, թե որքանով է նպատահարմար այդպես անել․ միլիարդավոր գումարների շահույթ է մտել մեր երկիր․ պատգամավորը հանդիպել է բողոքի ակցիա անող ավտոներկրողների հետ

10 տարի և ավել Հայաստանն այն վայրն է եղել, որտեղից մարդիկ եկել ու մեքենա են գնել, միլիարդավոր գումարներ են մտել այս երկիր։ Այս մասին ավտոներկրողների բողոքի ակցիայի ժամանակ լրագրողների հետ զրույցում ասաց ԱԺ «Հայաստան» խմբակցության պատգամավոր Գառնիկ Դանիելյանը։

«Հետևանքները կարճ ժամանակ հետո կզգացվեն։ Սա այն ճյուղն է, որ տնտեսության մեջ առյուծի բաժինն է կազմում։ Էդ գումարն արդեն չի մտնի բյուջե՝ դրանից բխող բոլոր հետևանքներով»,- ասաց պատգամավորը։

Նա նշեց, որ քիչ առաջ տնտեսավորների հետ հանդիպման էր։ Այնտեղ էլ տնտեսվարողներն են դժգոհում Լարսում ստեղծված իրավիճակից, ինչի հետևանքով բազմաթիվ խնդիրների առաջ են կանգնել։ 

«Վերին Լարսում գյուղմթերքով բեռնված բեռնատարներ են․ ռուսական ֆիտոսանիտարիան թույլ չի տալիս մտնել։ Էս իշխանություններն ամեն ինչ արել են, որ ոլորտը տանեն դեպի կործանման ու քանդման»,- ասաց ընդդիմադիր պատգամավորը։

Նա նշեց, որ ավտոներկրողների հարցում ոչ ոք չի կարող ստիպել ու պարտադրել նրանց, որ 20% շահույթ ունենան։

«Հիմա, որ մարդ 20% շահույթ չունի՝ ի՞նչ անի․ գնա, ուրիշ տեղից պարտք վերցնի, բերի, մինուսով աշխատի, ինչ ա թե այդ 20%-ը տա՞։ Գնացե՞լ եք, խոսացե՞լ եք էդ մարդկանց հետ։ Էս մարդկանց հարկերի միջոցով է տնտեսությունը շնչում։ Բյուջե փող լցնողներն էս մարդիկ են՝ կանչե՞լ են նրանց, խոսացե՞լ են այդ մասին, թե ինչ կլինի ու որքանով է նպատահարմար այդպես անել»,- ասաց պատգամավորը՝ հավելելով, որ որոշումն ապօրինի է, և խմբակցությունը գործին  ընթացք կտա: 

Նշենք, որ դեկտեմբերի 1-ից Հայաստանում ուժի մեջ է մտնում Հարկային օրենսգրքում փոփոխությունների և լրացումների նոր փաթեթը, որը շահութահարկ է սահմանում ավտոմեքենաների ներմուծմամբ զբաղվող ընկերությունների համար: