Ինչո՞վ վստահություն ներշնչեց «ՄՏՍ Հայաստանի» բաժնեմասերը գնած կիպրոսյան ընկերությունը. պարզաբանում է ՀԾԿՀ նախագահը

Հայաստանի հեռահաղորդակցության օպերատորներից «Վիվա-ՄՏՍ»-ի վաճառքի հարցում Հանրային ծառայությունները կարգավորող հանձնաժողովը զուտ տեխնիկական մասով է որոշում կայացնում. լրագրողների հետ զրույցում ասաց ՀԾԿՀ նախագահ Գարեգին Բաղրամյանը՝ պատասխանելով այն հարցին, թե ապրիլին բացասական եզրակացությունից հետո, ի՞նչ համոզիչ փաստարկ ունեցավ ՀԾԿՀ-ն՝ որոշումը փոխելու և ինչո՞վ վստահություն ներշնչեց «Վիվա ՄՏՍ»-ի բաժնեմասերը գնած կիպրոսյան ընկերությունը։

«Երբ դիմում են բաժնետոմսերի ձեռքբերման համար, օրենքը ենթադրում է, որ փաթեթն ուսումնասիրվում է հանձնաժողովի կողմից, այսինքն՝ զուտ տեխնիկական մասով է ստուգվում՝ արդյո՞ք կարող է գործունեությունը ծավալել, թե՞ ոչ։ Մնացած հարցերը, անվտանգության և պետական շահի հետ կապված, ներկայացվում են լիազոր մարմնին, ԲՏԱ-ին, որը քննարկելով ԱԱԾ-ի հետ՝ ներկայացնում է եզրակացություն»,- ասաց Բաղրամյանը։

Ըստ նրա՝ ԱԱԾ-ն էր նախնական բացասական դիրքորոշում ներկայացրել։

«Վերջին փաթեթը, որ ներկայացվել է, ենթադրում եմ՝ լրացուցիչ ինֆորմացիա է եղել, եզրակացությունը կա ԱԱԾ-ի»,- ասաց նա։

Իսկ թե ի՞նչ է փոխվել՝ նշեց, որ չի կարող ասել. «Ուսումնասիրությունը չեմ տեսնում, միայն եզրակացությունն է, որ խնդիր չունեն»։