Ինչ են քննարկել փակ հանդիպման ժամանակ Շահրամանյանն ու Արցախի պատգամավորները. «Հրապարակ»
«Հրապարակ» օրաթերթը գրում է․
Շաբաթվա սկզբին գրել էինք, որ Ադրբեջանի սեպտեմբերյան ագրեսիայից հետո առաջին անգամ Արցախի ԱԺ պատգամավորները մտադիր են ԱԺ նիստ հրավիրել, նախնական պայմանավորվածությամբ՝ այդ նիստը պետք է կայանար երեքշաբթի օրը` նոյեմբերի 28-ին, բայց մինչ օրս չի կայացել։ Ըստ մամուլում տեղ գտած լուրերի՝ նիստի կայանալուն խոչընդոտել է ԱՀ նախագահ Սամվել Շահրամանյանը, ով մեկ օր առաջ հանդիպել է «Ազատ հայրենիք»-ՔՄԴ խմբակցության պատգամավորների հետ ու խնդրել է նիստը հետաձգել, մինչեւ որոշ հարցեր ճշգրտի։
ԱՀ «Արդարություն» խմբակցության պատգամավոր Մետաքսե Հակոբյանը հաստատում է՝ հանդիպում պատգամավորների եւ Արցախի նախագահի միջեւ, իսկապես, եղել է, բայց Շահրամանյանը, ճիշտ հակառակը՝ խոսել է նիստ հրավիրելու անհրաժեշտության եւ կարեւորության մասին, ինչը, փաստացի, կամրագրի Արցախի պետական ինստիտուտներից գոնե խորհրդարանի գոյության փաստը։ ԱՀ նախագահի եւ խորհրդարանի պատգամավորների հանդիպումը տեղի է ունեցել անցած շաբաթ` պատգամավոր Հակոբյանը կոնկրետ օրը չի հիշում, սակայն հիշում է, որ 44-օրյա պատերազմի հանգամանքները քննող հանձնաժողով նրա այցից առաջ էր: Հիշեցնենք, որ Շահրամանյանն այս հանձնաժողով էր հրավիրված նոյեմբերի 24-ին՝ ուրբաթ օրը։ Իսկ խորհրդարանի՝ նախապես նշանակված երեքշաբթի օրվա նիստը չի կայացել «տեխնիկական» պատճառներով, քանի որ լիագումար նիստից առաջ նախ պետք է գլխադասային հանձնաժողովը նիստ անցկացնի, քննարկի օրակարգային նախագծերը, ապա նոր դրանք մտնեն լիագումար նիստի օրակարգ։
«Նախագահի հետ հանդիպմանն ընդհանրապես նիստ հետաձգելու մասին խոսք չի գնացել, ճիշտ հակառակը՝ նիստ հրավիրելու կարեւորության մասին Շահրամանյանն է ընդգծել։ Մենք` պատգամավորներս, որոշում ենք կայացրել այս շաբաթվա ընթացքում նիստ անցկացնել` շաբաթը չի ավարտվել, ուստի կարիք չկա տապալման մասին խոսել: Այո, երեքշաբթին նախնական պայմանավորվածություն էր, բայց չգումարվեց, քանի որ տեխնիկական խնդիրների պատճառով չհաջողվեց արտաքին հարաբերությունների մշտական հանձնաժողովի նիստ հրավիրել․ հանձնաժողովի անդամները տարբեր ժամանակ եկան, իսկ նախագահը՝ բավականին ուշ, դրանով պայմանավորված՝ որոշում կայացվեց այդ լիագումար նիստը հետաձգել։ Եթե չեմ սխալվում, մշտական հանձնաժողովի նիստն արդեն կայացել է, եւ որեւէ խոչընդոտ չկա, որ ԱԺ նիստ հրավիրենք, շաբաթն էլ առջեւում է, եւ աբսուրդ է, թե նախագահի պահանջով ենք հետաձգել»,- ասաց Հակոբյանը՝ փոխանցելով, որ նախագահի հետ հանպատրաստից են հանդիպել, իրենք Արցախի ներկայացուցչությունում ԱԺ նիստի օրակարգային եւ նախապատրաստական հարցերը քննարկելիս են եղել, երբ Շահրամանյանն իրենց այցի է եկել: Ի դեպ, հանդիպմանը ներկա են եղել Սամվել Բաբայանի կուսակից, ԱԺ խոսնակի ժամանակավոր պաշտոնակատար Գագիկ Բաղունցը ու եւս մեկ պատգամավոր՝ «Միասնական հայրենիք» կուսակցությունից․ «Կարելի է ասել՝ ինֆորմացիայի փոխանակում ենք ունեցել, դա պաշտոնական հանդիպում չէր, որի ընթացքում պետք է որոշում ընդունեինք։ Հիմնական զրույցը ծավալվել է իրավիճակի նկարագրության շուրջ, արցախցիների սոցիալական խնդիրների վերաբերյալ ենք բարձրաձայնել: Ի վերջո, ԱՀ եւ ՀՀ կառավարությունների շփումներից էինք խոսում, որ հարկ եղած դեպքում ինչպես հասցնել խնդիրները, եթե լուծողն այսօր Արցախի կառավարությունը չէ։ Խոսել ենք, այո, նիստ անցկացնելու կարեւորության մասին, մոտավոր օրակարգի մասին, Շահրամանյանը թեեւ խոսել է նիստի կարեւորության մասին, սակայն ասել է, որ մենք պետք է որոշենք օրը եւ ժամը, ինքը չի խառնվելու»։
Հակոբյանը մեկ անգամ եւս հայտարարեց, որ Սամվել Շահրամանյանն իրենց չի ասել, թե բանակցում է Բաքվի հետ՝ արցախցիների վերադարձի հարցի շուրջ, առավել եւս աբսուրդ է, թե այդ պատճառով կարող էր խնդրել, որ հետաձգեն ԱԺ նիստը։ Հակոբյանը հաստատեց մեր՝ ավելի վաղ հայտնած տեղեկատվությունը, որ առաջիկա նիստի օրակարգում երկու հարց է լինելու՝ նոր պատգամավորների երդմնակալության եւ Արցախի հարցով միջազգային հանձնախմբի ձեւավորման․ «Տեւական ժամանակ է` մենք տարբեր հանձնախմբեր ձեւավորելու վերաբերյալ քննարկումներ ենք ունենում, որոնցում ներգրավված կլինեն ոչ միայն խորհրդարանականներ, այլեւ Հայաստանից ու սփյուռքից հասարակական-քաղաքական գործիչներ, դիվանագետներ եւ այլք, որպեսզի կարողանանք Արցախի հարցը միջազգային խողովակներում լսելի դարձնել»։
Հիշեցնենք․ մենք գրել էինք, որ միջազգային հանձնախումբ ստեղծելու գաղափարը Վարդան Օսկանյանինն է, նրա հետ էլ Արցախի պատգամավորները քննարկում են հարցը: Մետաքսե Հակոբյանն ասաց, որ շատերի հետ են քննարկել։ Ի՞նչ մանդատով է օժտված լինելու ստեղծվելիք հանձնախումբը եւ ի՞նչ առաքելությամբ։ «Առաքելությունը լինելու է որեւէ մեկի օրակարգում չլինելը, որեւէ մեկի օրակարգից դուրս լինելը, ունենալ սեփական օրակարգ, որը հնարավորություն կտա Արցախի հարցը բարձրացնել միջազգային հարթակներում կամ քննարկման թեմա դարձնել։ Հանձնախմբի գործունեության ազդեցությունը կախված կլինի նրանից, թե ովքեր կլինեն ներկայացված հանձնախմբում»:
Ավելին՝ թերթի այսօրվա համարում։
