Տեղի է ունեցել ՀՀ ԱԺ մշտական հանձնաժողովների նիստերի դահլիճների պաշտոնական բացման արարողությունը

Ազգային ժողովի աշխատանքներն առավել հարմար եւ տեխնիկապես հագեցած դարձնելը մշտապես գերազանցում է սպասված արդյունքը: Մենք արդեն իսկ նման փորձ ունենք, երբ ձեզ հետ համագործակցության արդյունքում նոր շունչ ենք հաղորդել մեր ամենօրյա աշխատանքին եւ լրացուցիչ հետաքրքրություն ստեղծել Ազգային ժողովի հանդեպ: Ասել է ՀՀ ԱԺ նախագահ Ալեն Սիմոնյանը դեկտեմբերի 4-ին Ազգային ժողովի մշտական հանձնաժողովների նիստերի դահլիճների պաշտոնական բացման արարողության ժամանակ: Այս մասին հայտնում են ԱԺ-ից։

Խորհրդարանի նախագահը շնորհակալություն է հայտնել նախաձեռնության իրականացման համար, ինչի արդյունքում ԱԺ մշտական հանձնաժողովների գործունեության թափանցիկությունը տեխնիկապես ավելի տեսանելի կլինի ընտրողների համար: «Իրականացված աշխատանքը եւ համագործակցության օրինակելի փորձը, կարծում եմ, պետք է շարունակական լինեն»,- ասել է Ալեն Սիմոնյանը:

Բացման արարողությանը մասնակցել են Հայաստանում հավատարմագրված դեսպաններ, ՀՀ-ում ՄԱԶԾ գրասենյակի մշտական ներկայացուցիչ Նաթիա Նացվլիշվիլին, ԱԺ աշխատակազմի ղեկավար-գլխավոր քարտուղար Դավիթ Առաքելյանը, պատգամավորներ, ներկայացուցիչներ խորհրդարանի աշխատակազմից:

«Տեխնիկապես հագեցած հիանալի աշխատանքային միջավայր խորհրդարանական աշխատանքների համար. ակնառու են իրականացված աշխատանքների հստակ արդյունքները»,- ասել է Հայաստանում Շվեդիայի Թագավորության արտակարգ եւ լիազոր դեսպան Պատրիկ Սվենսոնը` ընդգծելով, որ Շվեդիայի կառավարությունը պատրաստակամ է տարբեր ծրագրերի շրջանակում աջակցելու Հայաստանի ժողովրդավարական օրակարգին: Գնահատելով «Նոր Հայաստան` ժամանակակից խորհրդարան» ծրագրի շրջանակում իրականացված աշխատանքները` դեսպանը համագործակցության շարունակականության պատրաստակամություն է հայտնել:

Շնորհավորելով տեխնիկապես գերհագեցած դահլիճների բացման կապակցությամբ` Նաթիա Նացվլիշվիլին կարեւորել է նման դահլիճների առկայությունը` համոզմունք հայտնելով, որ առավել արդյունավետ կընթանան խորհրդարանական քննարկումները:

ՀՀ ԱԺ աշխատակազմի ղեկավար-գլխավոր քարտուղար Դավիթ Առաքելյանը նշել է, որ վերանորոգված  դահլիճները խոսուն օրինակ են միջազգային գործընկերների հետ համագործակցության: Նա հույս է հայտնել, որ միջազգային գործընկերների հետ համագործակցությունը կլինի շարունակական եւ շնորհակալություն հայտնել կատարված աշխատանքների համար: Դավիթ Առաքելյանը ներկայացրել է դահլիճների տեխնիկական հագեցվածությունը:

Պատգամավորները եւս շնորհակալություն են հայտնել միջազգային գործընկերներին տեխնիկապես հագեցված դահլիճներով ապահովելու համար` ընդգծելով, որ նմանատիպ դահլիճներում նկատելիորեն կդյուրացվի աշխատանքը:

Հարկ է նշել, որ Ազգային ժողովի մշտական հանձնաժողովների դահլիճների տեխնիկական հագեցվածությունն ապահովել է ՄԱԶԾ «Նոր Հայաստան` ժամանակակից խորհրդարան» ծրագիրը, որը ֆինանսավորվում է Շվեդիայի կառավարության կողմից: