Արփա-Սևան թունելի շուրջ իսկական «թունելային խրախճանք» է

Դեռ 2008 թ.-ի փետրվարն էր, որ Հայաստանի կառավարության և Աբու-Դաբիի զարգացման հիմնադրամի միջև Արփա-Սևան թունելի վերակառուցման համար 10 մլն դոլար արտոնյալ վարկի տրամադրման համաձայնագիր ստորագրվեց:

Ընդհանուր առմամբ, Արփա Սևան ընկերությունը պետք է իրականացներ մոտ 30 մլն դոլարի աշխատանք: Կառավարությունն էլ իր հերթին պետք է մինչև 2017թ-ը վերանորոգեր շուրջ 43 կմ երկարություն ունեցող Արփա-Սևան թունելը: Այս տարիներին, երբ սրվեց ոռոգման խնդիրը, Սևանա լճից նախատեսված 170 մլն խմ-ի փոխարեն վերցրեցին 270 մլն խմ, թունելի վերանորոգման հարցը առավել քան կարևորվեց:

Իսկ թե իրականում ինչ է կատարվում թունելի ներսում, անհայտ է, քանի որ հենց այս թունելով է Կեչուտի ջրամբարով ջուր հասցվում Սևան, համալրելու լճի ջրային պաշարները: Այս թունելի պատմությունը շատ մութ է, քանի որ թունելը բաղկացած է երկու հատվածից և ջուրը հոսելով Կեչուտի ջրմաբարից դեպի թունել, այն ուղղվում է դեպի Եղեգիս գետ, որի վրա աշխատում են մեկ տասնյակից ավելի ՀԷԿ-եր:

Ի թիվս այլ սեփականատերերի, Եղեգիս գետի վրա ՀԷԿ ունի նաև ԱԺ պատգամավոր Հակոբ Հակոբյանը, կամ, ինչպես ասում են,  «Թունել» Հակոբը, իսկ Արփա-Սևան ՓԲԸ-ի տնօրենը նրա որդին է` Պարույր Հակոբյանը: Այնպես, որ տղան հոգ է տանում, որ թունելի ջուրը հոսի դեպի հայրիկի ՀԷԿ-երը:

Ժամանակ առ ժամանակ կառավարական մակարդակով է փակվել Արփա-Սևան թիվ 2 ջրատարը` վերանորոգման պատրվակով: Այսինքն, խաբելու կարիք չկա, փակում են, թիվ երկու թունելը ջուրը հանգիստ հոսում է Եղեգիս գետ:

Թունելը փակ համակարգ է որպես կառույց, բացի թունելի հետ առնչվող անձանցից և որոշ պաշտոնյաներից ոչ ոք չգիտի, թե իրականում ինչ է կատարվում ներսում:

Իսկ թե ինչու է մշտապես նշվում թիվ երկու թունելը, բացատրում է այն, որ առաջին և երկրորդ թունելների բացվածքից է ջուրը հոսում դեպի Եղեգիս գետը, այնպես որ ինչքան երկար «վերանորոգեն» թիվ երկու թունելը, այնքան հանգիստ կարող են լինել, որ Եղեգիսը ջրառատ կլինի, իսկ Սևանի մակարդակը խելամտորեն չի բարձրանա:

Իհարկե այս ամենը կատարվում է «միայն Սևանի շահերից ելնելով»:

Նախօրեին վարչապետ Հովիկ Աբրահամյանը թունելի վերանորոգման առնչությամբ ասել էր, որ «Արփա-Սևան» թունելի հետ կապված կա լուրջ անելիք, ինչը հնարավորություն կտա Սևանա լիճ ավելի շատ քանակությամբ ջուր տեղափոխել, հավելելով, որ թունելի վերանորոգումը հնարավորություն կտա 250 մլն խմ ջուր տեղափոխել Սևան: Նաև նշվել էր, որ թունելում նոր վնասվածքներ են ի հայտ եկել:

Հիշեցնենք, որ մինչ այդ խոսվում էր 270 մլն խմ-ի տեղափոխման մասին, իսկ նախօրեին վարչապետը հայտարարեց 250 մլն խմ-ի մասին:
Ինչևէ, ինչքան երկար թունելում վթարային հատվածներ ի հայտ գան, այնքան երկար հնարավոր է կառավարել Սևանի ջուրը: Այսպես մի հարվածով ոչ թե երկու, այլ իսկական նապաստակաորս է: Եվ վարկ, և լրացուցիչ գումարներ, և ձեռքի հետ` աշխատանք, և աշխատանքի խաբկանք, և բնության մասին հոգատարություն, և ոռոգման խնդրի մասին մտահոգություն, այսինքն իսկական «թունելային խրախճանք»: