Ես ապաքաղաքական անձ եմ բոլոր առումներով․ Կոռուպցիայի կանխարգելման հանձնաժողովի նախագահը չասաց, թե ինչ ճնշումներ են եղել իր վրա ՔՊ-ի կողմից
Ես ապաքաղաքական անձ եմ բոլոր առումներով։ Այս մասին ԱԺ ամբիոնից հայտարարեց Կոռուպցիայի կանխարգելման հանձնաժողովի նախագահ, և այս պահին նաև նախագահի թեկնածու Հայկուհի Հարությունյանը՝ արձագանքելով պատգամավոր Թագուհի Թովմասյանի հարցին։
Վերջինս հետաքրքրվեց, թե՝ ինչ ճնշումներ են եղել իր վրա՝ ՔՊ փակ նիստի ժամանակ։
Հայկուհի Հարությունյանը նկատեց, որ պետք է այդ հանդիպման վերաբերյալ տեղեկատվությունը հանրային սեփականություն դարձվի, որպեսզի կասկածները փարատվեն։
Նրա պատասխանը չգոհացրեց Թագուհի Թովմասյանին։
«Չհասկացա իհարկե՝ ինչ է տեղի ունեցել այդ նիստի ժամանակ, բայց այնումանայնիվ, կուզեի մեկ այլ հարցի պատասխանեք․ «TM աուդիտ» ՓԲԸ-ի հաշվետվության մեջ նշված էր, որ իրենց կողմից բացահայտվել են, որ ՔՊ-ն 525 նվիրատուներ է ունեցել, որոնց մասով տեղեկությունները հայտնի չեն և մեկ անձից ստացել է 4 մլն 992 հազար դրամ նվիրատվություն, այն դեպքում, երբ մեկ անձի կողմից տարեկան նվիրատվությունը պետք է կազմիր 2.5 մլն դրամ»,- ասաց նա՝ հարցնելով, թե ի՞նչ են արել այս ուղղությամբ ու արդյոք դա կոռուպցիա՞ չէ։
Հայկուհի Հարությունյանը նշեց, որ թե նախորդ տարի, թե՛ այս տարի հանձնաժողովը փորձել է ստուգել այդ տեղեկությունները։
«Իրականում հաշվետվությունների հիման վրա ստուգումն իրականացվել էր և նախորդ տարվա ստուգումներն իրականացվել է՝ հաշվի առնելով օերնսդրական մի շարք բացեր և թերացումներ։ Օրենքից բխող պատասխանատվություն ենթադրող դրույթների կիրառելիույթյունը բարձրացնելու հարցն առնվազն այդ տարվա համար անցումային դրույթներով համարվեց ոչ կիրառելի»,- ասաց նա՝ հավելելով, որ արդյունքներն ուսումնասիրության փուլում են։
