Ահուդողով սպասում ենք՝ բա որ մի բան եղավ, շենքը փլուզվեց, ի՞նչ պատասխան ենք տալու․ Փաշինյանը՝ վթարային շենքերի մասին

Արագածոտնի մարզի Ապարան քաղաքի Բաղրամյան 43 և Գարեգին Նժդեհ 7 հասցեներում գտնվող վթարային շենքերի փոխարեն Գարեգին Նժդեհի 36 հասցեում ամբողջովին պետական միջոցներով շուրջ 682 միլիոն դրամով կառուցվել է նոր բազմաբնակարան շենք՝ 43 բնակարաններով։ Նախկին երկու շենքեը եղել են 1800 քառակուսի, նորը՝ 2700 քառակուսի է։ Շենքի կառուցումն ավարտված է, հանձնված՝ պետական գույքի տնօրինությանը։

Այս մասին այսօր՝ դեկետեմբերի 7-ի կառավարության նիստում ասաց ՏԿԵ նախարար Գնել Սանոսյանը՝ նշելով, որ հաշվի է առնվել, որ շենքում հաշմանդամություն ունեցող անձինք կան։

«43 ընտանիքի 118 անձանց բնակարան կնվիրենք»,- ասաց նա։

Նիկոլ Փաշինյանը հետաքրքրվեց, թե արդյոք շենքերի վթարային դառնալը կապ ունի՞ երկրաշարժի հետ, ինչին ի պատասխան Քաղաքաշինության կոմիտեի նախագահը նկատեց, որ մասամբ՝ այո։

«Շենքերը կառուցման տարեթվերով բավականին մաշված են եղել, բայց երկրաշարժը նպաստել է, որ շենքերն ավելի վթարային աստիճան ստանան և դրա համար որոշվել է միջոցառումն իրականացնել։ Շինարարությունն ավարտվել է 2022 թվականին, կա մեկ սենյականոց 16 բնակարան, երկու սենյականոց՝ 14, երեք՝ 12, չորս՝ 1»,- ասաց նա՝ հավելելով, որ բնակարաններն ամբողջությամբ վերանորոգված են։

«Դուռ, լուսամուտ տեղադրված է, ամբողջությամբ վերանորոգված են բնարակարանները։ Ավարտական ակտը եղել է առանց թերությունների և 2022 թվականին շահագործման են հանձնվել»,- ասաց նա։

Նիկոլ Փաշինյանն էլ հետաքրքրվեց, թե՝ եթե 2022-ին արդեն ավարտել են, այդ դեպքում ինչո՞ւ են դրանք հիմա հանձնվում մարդկանց։

«Հիմնական աշխատանքներն ավարտվել են 2022 թվականին, բայց փաստաթղթերի հարցը չի կարգավորվել։ Որոշակի խնդիրներ եղել են, և փորձվել է այդ հարցերը շտկել»,-պարզաբանեց  Գնել Սանոսյանը։

Նիկոլ Փաշինյանը նկատեց, որ իրեն մարդիկ այդ հարցով դիմել են։

«Չեմ թաքցնի, պատգամավոր Մաթևոս Ասատրյանի հուղարկավորության ժամանակ են մոտեցել մարդիկ, և ասել, որ խնդիր կա։ Եթե կարող էինք մի ամսում լուծել հարցը, մի տարի ի՞նչ ենք արել։ Կա՞ պայմանավորվածություն նաև վթարային շենքերի լիկվիդացիայի հետ կապված, օրինակներ կան, որ նոր բնակարան ստանալուց հետո ընտանիքի մի մասը տեղափոխվում է նոր բնակարան, մյուսը՝ մնում են հնում։ Մենք էլ ահուդողով սպասում ենք՝ բա որ մի բան եղավ, շենքը փլուզվեց, ի՞նչ պատասխան ենք տալու։ Երաշխավորո՞ւմ ենք, որ հին բնակարանում ոչ մի մարդ չի մնալու, ժամանակացույցով հստակ վթարային շենքը հողին պետք է հավասարեցնենք»,- ասաց նա։

Արձագանքելով Փաշինյանին՝ Գնել Սանոսյանը նշեց, որ նոր բնարականի սեփականությունը վթարային շենքի բնակիչները ստանալու են, երբ հրաժարվեն հին բնակարանի սեփականությունից։