Երբ ջենտլմենները չեն կարողանում հաղթել խաղում՝ նրանք փոխում են խաղի կանոնները․ 2018-ին այդ կանոնները փոխեց խորհրդարանական մեծամասնությունը․ Գուրգեն Արսենյանը՝ կոռուպցիայի դեմ պայքարի մասին

Հասարակության ողջամտությունից է կախված, թե ինչպես են իրենք պայքար մղում այս կամ այն երևույթի դեմ։ Այս մասին ԱԺ-ում հայտարարեց  «Քաղաքացիական պայմանագիր» խմբակցության պատգամավոր Գուրգեն Արսենյանը՝ անդրադառնալով Հայաստանում գոյություն ունեցող կոռուպցիոն երևույթներին։

Նա այս համատեքստում անգլիական ասացվածք հիշեց․ «Երբ ջենտլմենները չեն կարողանում հաղթել խաղում՝ նրանք փոխում են խաղի կանոնները»,- ասաց Արսենյանը՝ համեմատելով ջենտլմենին հայ հասարակության հետ, ով մինչև 2018 թվականը փորձում էր հաղթահարել կոռուպցիան և, Արսենյանի խոսքով,  նրան դա չէր հաջողվում։

Նա նկատեց, որ 2018 թվականից հետո Հայաստանում  խաղի կանոնները փոխվել են։

«Խաղի կանոնները փոխել է այն քաղաքական թիմը՝ հայ ժողովրդի աջակցությամբ, որն այսօր որպես քաղաքական մեծամասնություն նստած է»,- ասաց ՔՊ-ական պատգամավորը։

Նա հիշեցրեց, որ 4 գումարումների ԱԺ պատգամավոր լինելով՝ կարող է ասել, որ այս դահլիճում ականատես է եղել տարբեր տեսակի պետական իշխանության մարմինների կողմից իրականացված գործողությունների, որի խորքային իմաստը եղել է  կոռուպցիան, սակայն ներկայացվել է որպես հրապարակային, հանրային, պետական շահերի տեսանկյունից բխող։

Նա բերեց կոռուպցիայի դեմ չհաջողված պայքարի դեպքեր՝ անդրադառնալով նաև Հյուսիս-հարավ գլոբալ ծրագրին։

«Ամեն հատվածի համար հայտարարում էին տենդեր։  Ասեմ՝ այս դահլիճում նստած, մինչև տենդեր հայտարարելը, արդեն գիտեինք՝ ով է հաղթելու, ում է տրված այդ մասը»,- ասաց Գուրգեն Արսենյանը։