Ողջունում ենք Հայաստանի և Ադրբեջանի պայմանավորվածությունը. ՌԴ ԱԳՆ

Ռուսաստանը ողջունում է Հայաստանի և Ադրբեջանի հայտարարությունը հարաբերությունները կարգավորելու և խաղաղության պայմանագիր կնքելու մտադրության, ինչպես նաև բանտարկյալների ազատ արձակման ուղղությամբ կոնկրետ քայլերի և միջազգային կազմակերպություններում Երևանի ու Բաքվի միջև միմյանց աջակցության մասին, ասել է ՌԴ ԱԳՆ պաշտոնական ներկայացուցիչ Մարիա Զախարովան։

Նախօրեին Բաքուն և Երևանը հրապարակել էին Ադրբեջանի նախագահ Իլհամ Ալիևի վարչակազմի և ՀՀ վարչապետ Նիկոլ Փաշինյանի աշխատակազմի համատեղ հայտարարությունը, որում հայտարարվում էր հարաբերությունները կարգավորելու և ինքնիշխանության և տարածքային ամբողջականության վրա հիմնված խաղաղության պայմանագրի կնքման` երկրների մտադրության մասին։ Բացի այդ, կողմերը պայմանավորվածություն են ձեռք բերել «շոշափելի քայլեր ձեռնարկել երկու երկրի միջև փոխադարձ վստահության ամրապնդման համար»։ Բաքուն ազատ է արձակել նաև 32 հայ զինվորականի, Երևանն իր հերթին ազատ է արձակել երկու ադրբեջանցի զինվորականի։

«Մոսկվան գոհունակությամբ է ընդունում Ադրբեջանի նախագահի վարչակազմի և Հայաստանի Հանրապետության վարչապետի գրասենյակի համատեղ հայտարարությունը, որը հաստատում է հարաբերությունները կարգավորելու և երկու երկրների միջև խաղաղության պայմանագիր կնքելու փոխադարձ մտադրությունը։ Հայտարարությունը նպաստում է վստահության փոխադարձ ամրապնդմանը և նոր հնարավորություններ է բացում հայ-ադրբեջանական հարաբերությունների կարգավորման գործընթացի խթանման գործում՝ Ռուսաստանի, Ադրբեջանի և Հայաստանի ղեկավարների 2020-2022 թվականների համապարփակ եռակողմ համաձայնագրերին համապատասխան»,- ասվում է Զախարովայի մեկնաբանության մեջ, որը հրապարակվել է ՌԴ ԱԳՆ կայքում:

Նա նշել է, որ ռուսական կողմը ողջունում է Հայաստանի և Ադրբեջանի միջև գերեվարված զինվորականներին ազատ արձակելու համաձայնությունը։ «Բոլորը բոլորի դիմաց» սկզբունքով ազատագրման գաղափարը առաջ է քաշվել Ռուսաստանի կողմից, ասվում է մեկնաբանության մեջ։

Ընդգծվում է, որ Ռուսաստանի Դաշնությունը պատրաստ է շարունակել ամեն կերպ աջակցել «տրանսպորտային հաղորդակցությունների ապաշրջափակման, սահմանի սահմանազատման, խաղաղության պայմանագրի կնքման և քաղաքացիական հասարակության միջոցով շփումների հարցում»։