Չունես գումար՝ պետք է ծառայես, կամ դատվես, ունես գումար՝ կարող ես հայրենիքի առջև ունեցած պարտքը փողով գնել․ Թադևոս Ավետիսյան

«Խնդիրը կա, բայց բերված լուծումն իրականում ավելի խորքային է»։ Այս մասին ԱԺ ամբիոնից հայտարարեց «Հայաստան» խմբակցության պատգամավոր Թադևոս Ավետիսյանը՝ անդրադառնալով խորհրդարանական արտահերթ նիստում ՔՊ-ական պատգամավոր Հայկ Սարգսյանի կողմից ներկայացված՝ «Զինվորական ծառայության և զինծառայողի կարգավիճակի մասին» օրենքում լրացումներ և փոփոխություն կատարելու մասին և ՀՀ  քրեական օրենսգրքում լրացում կատարելու մասին օրենքների նախագծերի փաթեթին։

Ըստ ընդդիմադիր պատգամավորի` այդ օրենքում սողանք կա՝ ժամկետային ծառայությունից խուսափելու համար։

«Իրականում  առաջարկվում է մի սողանցք, հնարավորություն, որով  կարելի է չծառայել, հայրենիքի առջև ունեցած պարտքը փողով գնել։ Այդ պարտքի կատարումը կատարել փողով։ Սա է իրականում»,- ասաց պատգամավորը։

Նա չի հերքում, որ խնդիրը կա և լուծում է պահանջում, բայց, ըստ Թադևոս Ավետիսյանի, այն ինչ առաջարկվում է՝ դեմ է Հայաստանի Սահմանադրությանը։

«Իրականում մենք սոցիալական պետություն ենք` սոցիալական արդարության հիմքով։ Չի կարելի ասել, որ եթե անապահով ես, փող չունես, ապա դու պետք է ունենաս այս ելքը՝ կամ պետք է դատվես, կամ պետք է հայրենիքի առջև  ծառայությունդ կատարես, իսկ եթե ունես փող՝ խնդրեմ, վճարիր փողն ու անցիր առաջ։ Սա նաև բարոյական և համամարդկային  արժեքներին է դեմ՝ խոսքը սոցիալական արդարության, հավասարության ու հանրության համերաշխ  զարգացման մասին է։ Չի կարելի նման ֆունդամենտալ հակասոցիալական քաղաքականությունը բերել օրենքի մակարդակ»,- ընդգծեց ընդդիմադիր պատգամավորը։

Նա մատնանշելով ՔՊ-ական պատգամավորներից Թագուհի Ղազարյանի դիտարկումը, թե՝ անապահովը դա ինտելեկտուալ ցածր մակարդակ ունեցողը չէ՝ պատգամավորը միաժամանակ հիշեցրեց նաև Նիկոլ Փաշինյանի խոսքերը՝ թե աղքատությունը մարդկանց ուղեղում է։

Թադևոս Ավետիսյանը համամիտ է ՔՊ-ական պատգամավորի հետ և նկատում է, որ աղքատությունը ոչ թե ուղեղի, այլ սոցիալական ապահովածության խնդիր է, որն այս օրենքի կյանքի կոչվելուց հետո, նոր այլ խնդիրներ առաջ կքաշի։

«Այս նախագծով՝ չունես գումար, հետևաբար կամ պետք է դատվես, կամ պետք է պարտադիր զինվորական ծառայության գնաս, կամ երկուսը միասին, եթե ունես գումար՝ ազատված ես ու կարող ես այդ կոմֆորտից օգտվել»,- ասաց Ավետիսյանը։